കോഴഞ്ചേരി: ഓടിക്കൊണ്ടിരുന്ന കാറിന് തീപിടിച്ചു. കാർ പൂർണമായും കത്തി നശിച്ചു. ആളപായമില്ല. തിരുവല്ല – കുമ്പഴ സംസ്ഥാന പാതയിൽ പുല്ലാട് മാടോലിൽ പമ്പിന് സമീപം ഇന്ന് പുലർച്ചെ 5:20-നാണ് സംഭവം. പുറമറ്റം കാട്ടാത്തിൽ മഹന്ത് കൃഷ്ണ (23) ആണ് വാഹനം ഓടിച്ചിരുന്നത്. ആലപ്പുഴയിലെ കിടങ്ങറ ക്ഷേത്രത്തിലെ പൂജാരിയാണ്.
ക്ഷേത്രത്തിലേക്ക് പോകുന്ന വഴി പുല്ലാട് പമ്പിൽ വന്ന് പെട്രോൾ ശേഖരിക്കാൻ എത്തിയപ്പോഴാണ് തീപിടുത്തം ഉണ്ടായത്. കാറിൽ നിന്നും പ്രത്യേക തരത്തിലുള്ള ഗന്ധം വരികയും ലൈറ്റ് കത്തുകയും ചെയ്തതിനെ തുടർന്ന് വാഹനം നിർത്തി അദ്ദേഹം ഓടി രക്ഷപ്പെടുകയായിരുന്നു. തിരുവല്ലയിൽ നിന്ന് എത്തിയ അഗ്നിശമന സേന യൂണിറ്റാണ് തീ അണച്ചത്.
