തിരുവാഭരണപാത നവീകരണം ഇനി പ്രധാനമന്ത്രിയുടെ ഗതിശക്തിയിലൂടെ

കോഴഞ്ചേരി: ശബരിമല തീർഥാടനവുമായി ബന്ധപ്പെട്ട് ചരിത്രപരവും ആത്മീയവുമായ പ്രാധാന്യമുള്ള തിരുവാഭരണപാതയുടെ നവീകരണത്തിന് പുതിയ വഴിതുറക്കുന്നു. പ്രധാനമന്ത്രിയുടെ “ഗതിശക്തി ദേശീയ മാസ്റ്റർ പ്ലാൻ”  പദ്ധതിയുടെ പരിധിയിൽ തിരുവാഭരണപാതയുടെ വികസനം പരിഗണിക്കുന്നതിനുള്ള നീക്കമാണ് കേന്ദ്രതലത്തിൽ സജീവമാകുന്നത്

പന്തളം വലിയകോയിക്കൽ ക്ഷേത്രത്തിൽ നിന്ന് ശബരിമലയിലേക്ക് തിരുവാഭരണ ഘോഷയാത്ര കടന്നുപോകുന്ന പരമ്പരാഗത പാതയ്ക്ക് നൂറ്റാണ്ടുകളുടെ പാരമ്പര്യമുണ്ട്. കാടും മലനിരകളും ഗ്രാമീണ മേഖലകളും ഉൾപ്പെടുന്ന ഈ പാതയിലൂടെയാണ് മകരവിളക്ക് കാലത്ത് തിരുവാഭരണ ഘോഷയാത്ര സന്നിധാനത്തേക്ക് എത്തുന്നത്. പരമ്പരാഗതമായി ഏകദേശം 83 കിലോമീറ്റർ ദൂരമാണ് ഘോഷയാത്ര കാൽനടയായി പിന്നിടുന്നത്.

നിലവിൽ പാതയുടെ പല ഭാഗങ്ങളും അടിസ്ഥാനസൗകര്യങ്ങളുടെ അപര്യാപ്തത നേരിടുന്നുണ്ട്. റോഡുകളുടെ അറ്റകുറ്റപ്പണി, നടപ്പാതകളുടെ സംരക്ഷണം, പാലങ്ങളും കലുങ്കുകളും, വെള്ളക്കെട്ട് ഒഴിവാക്കുന്നതിനുള്ള സംവിധാനങ്ങൾ, വൈദ്യുതി-വെളിച്ച സൗകര്യങ്ങൾ, സുരക്ഷാ സംവിധാനങ്ങൾ തുടങ്ങിയവ ഘട്ടംഘട്ടമായി മെച്ചപ്പെടുത്തേണ്ടതുണ്ട്.

വിവിധ വകുപ്പുകളുടെയും ഏജൻസികളുടെയും ഏകോപനത്തോടെ  അടിസ്ഥാനസൗകര്യ പദ്ധതികൾ ആസൂത്രണം ചെയ്യുന്നതിനുള്ള ഡിജിറ്റൽ പ്ലാറ്റ്‌ഫോമാണ് ഗതിശക്തി ദേശീയ മാസ്റ്റർ പ്ലാൻ ജി ഐ എസ് (GIS) അടിസ്ഥാനത്തിലുള്ള വിവരങ്ങൾ ഉപയോഗിച്ച് പദ്ധതികളുടെ ആസൂത്രണം, നിരീക്ഷണം, വിവിധ ഏജൻസികൾ തമ്മിലുള്ള ഏകോപനം എന്നിവ സാധ്യമാക്കുന്നതാണ് ഇതിന്റെ പ്രധാന പ്രത്യേകതകൾ.

തിരുവാഭരണപാതയുടെ നവീകരണം പന്തളം മുതൽ ശബരിമല വരെയുള്ള പ്രദേശങ്ങളുടെ ഗതാഗതസൗകര്യം മെച്ചപ്പെടുത്തുന്നതിനൊപ്പം തീർഥാടന ടൂറിസത്തിനും പ്രയോജനപ്പെടും. ഓരോ മണ്ഡല-മകരവിളക്ക് കാലത്തും ആയിരക്കണക്കിന് ഭക്തർ ആശ്രയിക്കുന്ന പാതയായതിനാൽ സ്ഥിരമായ അടിസ്ഥാനസൗകര്യ വികസനം ആവശ്യമാണ്.

ഇതിനിടെ, ശബരിമലയുടെ ഗതാഗതബന്ധം മെച്ചപ്പെടുത്തുന്നതിനുള്ള മറ്റ് കേന്ദ്ര പദ്ധതികളും പരിഗണനയിലുണ്ട്. അങ്കമാലി–ശബരിമല റെയിൽപാതയുടെ പുതുക്കിയ എസ്റ്റിമേറ്റ് കേരളത്തിന്റെ അംഗീകാരത്തിനായി സമർപ്പിച്ചിട്ടുണ്ടെന്നും  കേരളം നിബന്ധനാപൂർവം സമ്മതം അറിയിച്ചിട്ടുണ്ടെന്നും കേന്ദ്ര സർക്കാർ വ്യക്തമാക്കിയിട്ടുണ്ട്.

തിരുവാഭരണപാതയുടെ വികസനത്തിനായുള്ള ഗതിശക്തി നീക്കം യാഥാർഥ്യമാകുന്നതോടെ പാതയുടെ പൈതൃകവും തീർഥാടന പ്രാധാന്യവും നിലനിർത്തിയുള്ള സമഗ്ര നവീകരണത്തിനാണ് വഴിയൊരുങ്ങുക. പദ്ധതിയുടെ വിശദമായ രൂപരേഖയും വിവിധ വകുപ്പുകളുടെ പങ്കാളിത്തവും സംബന്ധിച്ച തുടർനടപടികളാണ് ഇനി നിർണായകം. പദ്ധതിയെ സ്വാഗതം ചെയ്യുന്നതായി തിരുവാഭരണപാത സംരക്ഷണ സമിതി ജനറൽ സെക്രട്ടറി പ്രസാദ് കുഴികാല അറിയിച്ചു