ആലപ്പുഴ : കൈനകരി ഗ്രാമ പഞ്ചായത്ത് രണ്ട്, മൂന്ന് വാർഡുകളിലെ റോഡുകളുടെ നിർമ്മാണത്തിന് തുടക്കമായി. എൽസി ജെട്ടിക്ക് സമീപം നടന്ന ചടങ്ങിൽ ഗ്രാമപഞ്ചായത്ത് പ്രസിഡന്റ് എം സി പ്രസാദ് റോഡുകളുടെ നിർമ്മാണ ഉദ്ഘാടനം നിർവഹിച്ചു.
2024-25 വർഷത്തെ ജനകീയ ആസൂത്രണ പദ്ധതിയിൽ ഉൾപ്പെടുത്തിയാണ് നിർമ്മാണം. മൂന്നാം വാർഡിൽ കല്ലുപാലം മുതൽ എൽസി ജെട്ടി വരെയുള്ള 480 മീറ്റർ, രണ്ടാം വാർഡിൽ ആലുംന്തറ മുട്ടു മുതൽ വടക്കോട്ട് 420 മീറ്റർ എന്നിങ്ങനെയാണ് റോഡുകൾ നിർമ്മിക്കുന്നത്.
20 ലക്ഷം രൂപയാണ് ചെലവ്. വർഷങ്ങളായി കൈനകരിയിലെ പാടശേഖര ബണ്ടുകളിൽ ജല ഗതാഗതത്തെ ആശ്രയിച്ച് താമസിക്കുന്നവർക്ക് പുതിയ റോഡ് ആശ്വാസമാകും. ബ്ലോക്ക് പഞ്ചായത്ത് സ്ഥിരം സമിതി അധ്യക്ഷ ഷീല സജീവ് അധ്യക്ഷയായി.
