പത്തനംതിട്ട : പത്തനംതിട്ട ജനറൽ ആശുപത്രിയിലെ ഡോക്ടർക്കെതിരെ പൊലീസിൽ പരാതി. മോർച്ചറിയിൽ മൃതദേഹം സൂക്ഷിക്കുന്നതിനുള്ള അനുമതി പത്രത്തിൽ ഒപ്പീടീപ്പിക്കുവാൻ എത്തിയ ആളിനോട് മോശമായി പെരുമാറിയെന്നാരോപിച്ചാണ് ഡോക്ടർക്കെതിരെ പൊലീസിൽ പരാതി ലഭിച്ചത്. ജനറൽ ആശുപത്രിയിലെ ഓർത്തോപീഡിക് സർജൻ ഡോ. എം. ജെ.സുരേഷ് കുമാറിനെതിരെയാണ് പ്രക്കാനം സ്വദേശി പി.കെ. സുനിൽ കുമാർ പരാതി നൽകിയത്.
സുനിൽകുമാറിൻ്റെ ബന്ധുവായ യുവതി തൊണ്ടയിൽ ഭക്ഷണം കുടുങ്ങി മരിച്ചത് കഴിഞ്ഞ ദിവസമായിരുന്നു. മൃതദേഹം ആശുപത്രി മോർച്ചറിയിൽ സൂക്ഷിച്ചിരിക്കുന്നതിന് ഡോക്ടറുടെ സമ്മതപത്രം ആവശ്യമായിരുന്നു. ഇതിനായി ഒപിയിൽ എത്തി ഡോക്ടറെ സമീപിച്ചപ്പോഴാണ് ഡോക്ടർ തട്ടിക്കയറുകയും മറ്റുള്ളവരുടെ മുൻപിൽ വച്ച് അപമാനിക്കുകയും ചെയ്തുവെന്ന് കാട്ടി സുനിൽകുമാർ പത്തനംതിട്ട പൊലീസിൽ പരാതി നൽകിയത്. ഇതു സംബന്ധിച്ച് സ്ഥലം എം എൽഎയും ആരോഗ്യ മന്ത്രിയുമായ വീണാ ജോർജിനും പരാതി നൽകിയതായി സുനിൽകുമാർ പറഞ്ഞു
