തിരുവനന്തപുരം: സംസ്ഥാനത്ത് മഴ തുടരുന്നു. വരുന്ന അഞ്ച് ദിവസത്തേക്ക് സംസ്ഥാനത്ത് വിവിധ ജില്ലകളിൽ മഴയ്ക്കുള്ള സാധ്യതയുണ്ടെന്ന് കാലാവസ്ഥാ വകുപ്പ്. ഇന്ന് പത്തനംതിട്ട, ഇടുക്കി, മലപ്പുറം, വയനാട്, കണ്ണൂർ ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.
അറബിക്കടലിന്റെ മധ്യ പടിഞ്ഞാറൻ ഭാഗത്ത് ശക്തി കൂടിയ ന്യൂനമർദ്ദം നിലനിൽക്കുകയാണ്. ഇത് അടുത്ത 12 മണിക്കൂറിനുള്ളിൽ കിഴക്കൻ-തെക്കുകിഴക്കൻ ദിശയിലേക്ക് നീങ്ങി സാധാരണ ന്യൂനമർദ്ദമായി മാറാനാണ് സാധ്യത. കന്യാകുമാരിയിലും അതിനോട് ചേർന്ന പ്രദേശങ്ങളിലും ഏകദേശം 1.5 കിലോമീറ്റർ ഉയരത്തിൽ ചക്രവാത ചുഴി നിലനിൽക്കുന്നുവെന്നതും ശ്രദ്ധേയമാണ്. ഇതോടെ തെക്കൻ ജില്ലകളിലും മധ്യകേരളത്തിലും മഴയുടെ തീവ്രത കുറയാതെ തുടരുമെന്നാണ് പ്രവചനം.
എന്നാൽ വടക്കൻ ബംഗാൾ ഉൾക്കടലിനും സമീപ പ്രദേശങ്ങൾക്കും മുകളിൽ ഒക്ടോബർ 10-ഓടെ പുതിയ ചക്രവാത ചുഴി രൂപപ്പെടാനുള്ള സാധ്യതയുമുണ്ട്. ഇതിന്റെ സ്വാധീനത്താൽ സംസ്ഥാനത്ത് ഇടിമിന്നലോടുകൂടിയ മഴയ്ക്ക് സാധ്യതയുണ്ടാകും. ചില സ്ഥലങ്ങളിൽ മണിക്കൂറിൽ 30 മുതൽ 40 കിലോമീറ്റർ വരെ വേഗതയിൽ കാറ്റ് വീശാനും ഇടയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
