റാന്നി: റാന്നി- കോഴഞ്ചേരി റോഡിൽ പുതമൺ പുതിയ പാലത്തിൻ്റെ അപ്രോച്ച് റോഡിൽ വിള്ളൽ. പുതമൺ കരയോട് ചേർന്ന ഭാഗത്താണ് വിള്ളൽ രൂപപ്പെട്ടിരിക്കുന്നത്. ഇവിടെ അപ്രോച്ച് റോഡ് ഇരുത്തിയിട്ടുമുണ്ട്. പുതിയ പാലത്തിൻ്റെ ഉദ്ഘാടനം കഴിഞ്ഞ് മാസങ്ങൾക്കുള്ളിലാണ് അപ്രോച്ച് റോഡിൽ വിള്ളൽ കണ്ടെത്തിയത്. യാത്രക്കാർ ഇപ്പോൾ ഇതുവഴി ഭീതിയോടെയാണ് സഞ്ചരിക്കുന്നത്.
പഴയ പാലത്തിൻ്റെ തൂണുകൾക്ക് ബലക്ഷയം സംഭവിച്ചതിനെ തുടർന്നാണ് പുതിയ പാലം നിർമിച്ചത്. നിർമ്മാണത്തിലെ അപാകതയാണ് വിള്ളലിന് കാരണമെന്ന് നാട്ടുകാർ ആരോപിച്ചു.
എന്നാൽ റോഡിൻ്റെ വശം കെട്ടിയുയർത്തിയ ഭാഗം വിണ്ടുകീറിയതാണെന്നും ആശങ്കപ്പെടെണ്ട സാഹചര്യമില്ലെന്നും പൊതു മരാമത്ത് അധികൃതർ വ്യക്തമാക്കി. മഴയ്ക്ക് ശേഷം അറ്റകുറ്റപണി നടത്തുമെന്നും അവർ പറഞ്ഞു.
