പത്തനംതിട്ട : ശബരിമല തീർത്ഥാടന കാലത്ത് സന്നിധാനം, പമ്പ, നിലയ്ക്കൽ എന്നിവിടങ്ങളിൽ കലാപരിപാടികൾ നടത്തുന്നതിനായി 30 ലക്ഷം രൂപ ചെലവഴിക്കുന്നതിനുള്ള നിർദേശം തിരുവിതാംകൂർ ദേവസ്വം ബോർഡ് അടിയന്തരമായി പുനപരിശോധിക്കണമെന്ന് തിരുവിതാംകൂർ ദേവസ്വം എംപ്ലോയീസ് ഫ്രണ്ട് ആവശ്യപ്പെട്ടു.
പ്രശസ്തരായ ഗായകരും കലാകാരന്മാരുമുൾപ്പെടെയുള്ള നിരവധി ഭക്തർ മുൻകാലങ്ങളിൽ സന്നിധാനത്തെയും പമ്പയിലെയും സ്റ്റേജുകളിൽ യാതൊരു പ്രതിഫലവും വാങ്ങാതെ അയ്യപ്പന് വഴിപാടായി കലാപ്രകടനങ്ങൾ സമർപ്പിച്ചിരുന്നു. ഇന്നും സന്നിധാനത്തെ സ്റ്റേജിൽ പരിപാടികൾ അവതരിപ്പിക്കാൻ അവസരം കാത്തിരിക്കുന്ന ആയിരക്കണക്കിന് ഭക്തരും കലാകാരന്മാരും, ഒപ്പം ദേവസ്വം ജീവനക്കാരിൽ തന്നെയുള്ള കഴിവുള്ള കലാകാരന്മാരുമുണ്ട്.
കലാപരിപാടികൾക്ക് ആവശ്യമായ സ്ഥലവും സ്റ്റേജും ശബ്ദസംവിധാനവും ഒരുക്കുന്നതിനുള്ള ചെറിയ ചെലവ് മാത്രമാണ് ബോർഡിന് നിലവിൽ വഹിക്കേണ്ടിവരുന്നത്. അതിനപ്പുറം കലാകാരന്മാർക്ക് പ്രതിഫലം നൽകുന്നതടക്കം ലക്ഷങ്ങൾ ചെലവഴിക്കുന്നതിന്റെ ആവശ്യകത എന്താണെന്ന് ബോർഡ് വ്യക്തമാക്കണമെന്ന് സംഘടന ചൂണ്ടിക്കാട്ടി.
