പത്തനംതിട്ട: ശബരിമലയിൽ ഉപയോഗശൂന്യമായ അരവണ നശിപ്പിക്കുന്നതിനുള്ള ടെൻഡർ നടപടികൾ അവസാനഘട്ടത്തിലേക്ക്.
ദേവസ്വം ബോർഡിന്റെ മാനദണ്ഡങ്ങൾ പാലിച്ച 3 കമ്പനികളാണ് അരവണ നശിപ്പിക്കുന്നതിനുള്ള ടെൻഡറിൻ്റെ അവസാന പട്ടികയിൽ എത്തിയത്.
ടെൻഡറിൽ ഏറ്റവും കുറഞ്ഞ തുക രേഖപ്പെടുത്തിയ കോട്ടയം ഏറ്റുമാനൂർ ആസ്ഥാനമായ “ഇന്ത്യൻ സെൻട്രിഫ്യൂജ് ” എന്ന കമ്പനിക്ക് അരവണ നശിപ്പിക്കാൻ കരാർ നൽകുമെന്നാണ് സൂചന.
ടിന്നുകളിൽ നിന്ന് അരവണ വേർപെടുത്തി വളമാക്കുമെന്നാണ് കമ്പനി കരാർ ഉടമ്പടിയിൽ രേഖപ്പെടുത്തിയിരിക്കുന്നത്. 1.16 കോടി രൂപയാണ് അരവണ നശിപ്പിക്കുന്നതിനുള്ള കുറഞ്ഞ തുക രേഖപ്പെടുത്തിയിരിക്കുന്നത്. ഹിന്ദുസ്ഥാൻ ലാറ്റക്സ് കമ്പനി 1.89 കോടി രൂപയും അക്വേഷ്യ വാട്ടർ സൊല്യൂഷൻസ് 1.76 കോടി രൂപയുമാണ് രേഖപ്പെടുത്തിയത്.
അരവണയിലെ ഏലയ്ക്കയിൽ കീടനാശിനിയുടെ അംശം കണ്ടെത്തിയതിനെ തുടർന്ന് കഴിഞ്ഞ വർഷം ജനുവരിയിലാണ് അരവണ വിൽക്കാൻ പാടില്ലെന്ന് ഹൈക്കോടതി ഉത്തരവിട്ടത്. 6.65 കോടി രൂപയുടെ അരവണയാണ് ഉണ്ടായിരുന്നത്. ദേവസ്വം ബോർഡ് സുപ്രീം കോടതിയെ സമീപിച്ചതോടെ കേസ് തള്ളി. അരവണ വിൽക്കാൻ ഉത്തരവിട്ടു. അപ്പോഴേക്കും അരവണയുടെ കാലാവധി അവസാനിച്ചു. അതാണ് ദേവസ്വം ബോർഡ് നശിപ്പിക്കാൻ ഒരുങ്ങുന്നത്.
മാളികപ്പുറം ക്ഷേത്രത്തിന് സമീപമുള്ള കെട്ടിടത്തിൽ സൂക്ഷിച്ചിരിക്കുന്ന അരവണ ടിന്നുകൾ മർദം താങ്ങാനാകാതെ ഏതു നിമിഷവും പൊട്ടാവുന്ന സ്ഥിതിയാണ്. അങ്ങനെ സംഭവിച്ചാൽ ആനകൾ ശർക്കരയുടെ മണം പിടിച്ച് എത്താനും സാധ്യത ഏറെയാണ്
