വയനാട് : വയനാട്ടിലെ ദുരന്തമേഖലയില്‍ വിവിധ സംഘങ്ങളായി തിരിഞ്ഞ് തിരച്ചില്‍. 40 ടീമുകൾ 6 സോണുകളിലായി തിരച്ചിൽ നടത്തും.സൈന്യം, എൻഡിആർഎഫ്, ഡിഎസ്ജി, കോസ്റ്റ് ഗാർഡ്, നേവി, എംഇജി ഉൾപ്പെടെയുള്ള സംയുക്ത സംഘമാണ് തിരച്ചിൽ നടത്തുന്നത്.ഓരോ ടീമിലും വനംവകുപ്പും നാട്ടുകാരും ഉണ്ടായിരിക്കും.രണ്ടായിരത്തോളം പേരാണ് ദൗത്യ സംഘത്തിൽ ആകെയുള്ളത്.6 നായകളും തിരച്ചിലിൽ സഹായിക്കുന്നതിനായി ഉണ്ട് .
വീടുകള്‍ കേന്ദ്രീകരിച്ചാണ് രക്ഷാപ്രവര്‍ത്തനം നടക്കുക.മണ്ണിൽ പുതഞ്ഞ മൃതദേഹം കണ്ടെത്താൻ ഐബോഡും ഉപയോഗിക്കും.സൈന്യം നിര്‍മ്മിച്ച ബെയ്‌ലി പാലത്തിലൂടെ 25 ആംബുലൻസുകളെ മുണ്ടക്കൈയിലേക്ക് ഒരു ദിവസം കടത്തിവിടും.ചാലിയാർ പുഴയുടെ 40 കിലോമീറ്റർ പരിധിയിലും തെരച്ചിൽ നടത്തും.ദുരന്തത്തിൽ ഇതുവരെ 291മരണം സ്ഥിരീകരിച്ചു.
ബി.എസ്.എന്‍.എല്‍. മുണ്ടക്കൈ-ചൂരല്‍മല മേഖലയില്‍ 4ജി സേവനം പുനഃസ്ഥാപിച്ചു. ജില്ലാ ഭരണകൂടത്തിന് അതിവേഗ ഇന്റര്‍നെറ്റ് സൗകര്യവും ആരോഗ്യവകുപ്പിന് ടോള്‍ഫ്രീ നമ്പറും ബി.എസ്.എന്‍.എല്‍. നല്‍കി.എയര്‍ടെല്‍, വി, ജിയോ എന്നീ കമ്പനികള്‍ മേഖലയിലെ ഉപഭോക്താക്കള്‍ക്ക് സൗജന്യ ഡാറ്റയും കോളും ലഭ്യമാക്കിയിട്ടുണ്ട്.
