റാന്നി: തോട്ടമൺകാവ് ദേവീക്ഷേത്ര സന്നിധിയിൽ അംബായാഗം 2026ന്റെ ഭാഗമായി നടന്നുവരുന്ന 21 ദിവസത്തെ നാരായണീയ പാരായണയജ്ഞത്തിന്റെ പതിനാലാം ദിവസത്തെ ചടങ്ങുകൾ ഹിന്ദു ഐക്യവേദി സംസ്ഥാന വൈസ് പ്രസിഡന്റ് അഡ്വ. കെ. ഹരിദാസ് ഉദ്ഘാടനം ചെയ്തു. ദേവസ്വം പ്രസിഡന്റ് അഡ്വ. ഷൈൻ ജി.കുറുപ്പ് അധ്യക്ഷത വഹിച്ചു.
ആചാര്യ വിജയലക്ഷ്മി, പി. എസ്. ആനന്ദമ്മ, ദേവസ്വം സെക്രട്ടറി പി. ശ്രീകുമാർ, സി. എൻ. പ്രസാദ് തുടങ്ങിയവർ പ്രസംഗിച്ചു. പതിനാലാം ദിവസത്തെ യജ്ഞവേദിയിൽ നാരായണീയ പാരായണത്തിൽ സജീവമായി പങ്കെടുക്കുന്ന മുതിർന്ന അംഗങ്ങളെ അഡ്വ.കെ.ഹരിദാസ് ആദരിച്ചു.
അംബായാഗത്തിന്റെ പ്രധാന ഒരുക്കങ്ങളിലൊന്നായ കലവറ നിറയ്ക്കലിലൂടെ യാഗശാലയിലേക്കും അന്നദാനത്തിനും ആവശ്യമായ സാധനങ്ങൾ ഭക്തജനങ്ങളിൽ നിന്ന് സ്വീകരിക്കുന്നത് ഒക്ടോബർ 4-ന് തുടങ്ങും. ഓരോ കുടുംബത്തിനും തങ്ങളുടെ കഴിവനുസരിച്ച് സാധനങ്ങൾ സമർപ്പിച്ച് അംബായാഗത്തിന്റെ ഭാഗമാകാനുള്ള അവസരമാണ് ഒരുക്കിയിരിക്കുന്നത്.
അരി, പഞ്ചസാര, വെളിച്ചെണ്ണ, പയർവർഗങ്ങൾ, തേങ്ങ, കാച്ചിൽ, നാളികേരം തുടങ്ങിയ ആവശ്യസാധനങ്ങളാണ് പ്രധാനമായും ശേഖരിക്കുന്നത്. വീടുകളിൽ നിന്നുള്ള ചെറിയൊരു സമർപ്പണം പോലും അംബായാഗത്തിന്റെ കൂട്ടായ്മയിലേക്ക് വലിയൊരു പങ്കാളിത്തമായി മാറുമെന്ന സന്ദേശത്തോടെയാണ് കലവറ നിറയ്ക്കലിന് ആഹ്വാനം ചെയ്തിരിക്കുന്നത്.
ഒക്ടോബർ 4-ന് രാവിലെ മുതൽ വിവിധ പ്രദേശങ്ങളിൽ നിന്ന് സാധനങ്ങൾ ശേഖരിക്കുന്നതിനായി വാഹനങ്ങൾ എത്തുന്നതായും സംഘാടകർ അറിയിച്ചു. ഒക്ടോബർ 9 മുതൽ 18 വരെ നടക്കുന്ന അംബായാഗത്തിൽ ആയിരക്കണക്കിന് ഭക്തജനങ്ങൾ പങ്കെടുക്കുന്നതിനാൽ യാഗശാല, അന്നദാനം തുടങ്ങിയ ആവശ്യങ്ങൾക്കായി വിപുലമായ ഒരുക്കങ്ങളാണ് നടത്തിവരുന്നത്.
