കോട്ടയം: ആറന്മുള പാർത്ഥസാരഥി ക്ഷേത്രത്തിലെക്കുള്ള പാളത്തൈര് സമർപ്പണം 3 ന് നടക്കും. ഇതിനുള്ള ഒരുക്കങ്ങൾ പൂർത്തിയായി. അഷ്ടമി രോഹിണി ദിനമായ 4 -നാണ് ജന്മാഷ്ടമി സദ്യ. ഇതിനായി വാഴൂർ തീർഥപാദാശ്രമ ഗോശാലയിൽ തയാറാക്കിയ തൈരും ചേനപ്പാടിയിലെ ഭക്തർ സമർപ്പിക്കുന്ന തൈരും ഉൾപ്പെടെ 1500 ലിറ്ററിലേറെയാണ് ക്ഷേത്രത്തിൽ ഘോഷയാത്രയായി എത്തി സമർപ്പിക്കുന്നത്. പാർത്ഥസാരഥി ഭക്തജന സമിതി രക്ഷാധികാരിയും വാഴൂർ തീർത്ഥപാദാശ്രമ കാര്യദർശിയുമായ സ്വാമി ഗരുഡധ്വജാനന്ദതീർത്ഥപാദ അറിയിച്ചു.
3 -ന് രാവിലെ 8 ന് കിഴക്കേക്കര ഭഗവതി ക്ഷേത്രത്തിൽ നിന്ന് ഘോഷയാത്ര പുറപ്പെടും. ചേനപ്പാടി എസ് എൻ ഡി പി യോഗം, പരുന്തന്മല ശ്രീദേവി വിലാസം ഭജന സമിതി, വിഴിക്കത്തോട് ഭജന സമിതി എന്നിവയുടെ സഹകരണത്തോടെയാണ് നാമസങ്കീർത്തന ഘോഷയാത്ര സംഘാടിപ്പിക്കുന്നതെന്ന് സംഘാടകർ പറഞ്ഞു.
