ആലപ്പുഴ: 2027-ലെ സെൻസസിന് മുന്നോടിയായി ജില്ലാതല സെൻസസ് ഉദ്യോഗസ്ഥരുടെ ആദ്യ ബാച്ചിനുള്ള പരിശീലനം ആരംഭിച്ചു. ജില്ലാ കളക്ട്രേറ്റിൽ നടന്ന പരിശീലന പരിപാടി കെ ഇമ്പശേഖർ ഉദ്ഘാടനം ചെയ്തു. ഏപ്രിൽ 22 വരെ ആദ്യ ബാച്ചിൻ്റെ പരിശീലനം തുടരും. എ ഡി എം ബി. ജ്യോതി അധ്യക്ഷത വഹിച്ചു. ജൂനിയർ സൂപ്രണ്ട് ആർ. ജയകുമാറിനാണ് പരിശീലന ചുമതല. ദീപ്തി ദിവാകരൻ, എൽ മല്ലിക എന്നിവർ പരിശീലനം നയിച്ചു.
സെൻസസിന്റെ ആദ്യഘട്ടം ജൂലൈ 12 മുതൽ ജൂലൈ 31 വരെയും രണ്ടാംഘട്ടം 2027 ഫെബ്രുവരി ഒന്ന് മുതൽ 28 വരെയുമാണ് നടക്കുക. ഐ ടി സാങ്കേതികവിദ്യയുടെ സഹായത്തോടെയുള്ള ആദ്യ സെൻസസ് ആണിത് എന്ന പ്രത്യേകതയും ഉണ്ട്. അവസാന സെൻസസ് 2011 ലാണ് നടന്നത്. ജില്ലാതല ഉദ്യോഗസ്ഥർക്കുള്ള രണ്ടാം ഘട്ട പരിശീലനം ഏപ്രിൽ 23 മുതൽ 25 വരെ കളക്ടറേറ്റ് കോൺഫറൻസ് ഹാളിൽ നടക്കും.
