ആരോഗ്യ മന്ത്രിയുമായുള്ള ചർച്ചയും പരാജയം : ആശാ വർക്കർമാർ സമരം തുടരും

തിരുവനന്തപുരം : ആരോ​ഗ്യമന്ത്രി വീണാ ജോർജുമായി ആശാ പ്രവർത്തകർ നടത്തിയ ചർച്ചയും പരാജയപ്പെട്ടു.രാവിലെ NHM ഡയറക്ടറുമായി  ആശാ വർക്കർമാർ നടത്തിയ ചർച്ചയും പരാജയമായിരുന്നു. മുൻപ് നടത്തിയ ചർച്ചയിൽ നിന്നും ഒരു ശതമാനം പോലും മുന്നോട്ടു പോകാനുള്ള യാതൊന്നും മന്ത്രിയുമായുള്ള ചർച്ചയിൽ ഉണ്ടായില്ലെന്നും ചർച്ച നടത്തിയെന്ന് വരുത്തിതീർക്കുക മാത്രമായിരുന്നു സർക്കാരിന്റെ ഉദ്ദേശ്യമെന്നും ആശാ വർക്കർമാർ ആരോപിച്ചു. ആവശ്യങ്ങൾ അംഗീകരിക്കാതെ സമരത്തിൽനിന്നു പിന്നോട്ടില്ലെന്നും നാളെ രാവിലെ 11നു നിരാഹാര സമരം ആരംഭിക്കുമെന്നും ആശാ പ്രവർത്തകർ അറിയിച്ചു.