എടത്വ : കൈവിരികൾ തകർന്ന തലവടി മുരിക്കോലുമുട്ട് പാലം അപകട ഭീഷണിയിൽ. കാലപ്പഴക്കത്താൽ പാലവും കൈവിരികളും പൂർണ്ണമായി തകർന്ന നിലയിൽ. തലവടി ഗ്രാമപഞ്ചായത്ത് 8, 11 വാർഡുകൾ തമ്മിൽ ബന്ധിപ്പിക്കുന്ന തലവടി മുരിക്കോലുമുട്ട് പാലമാണ് പതിറ്റാണ്ടുകളായി അറ്റകുറ്റപ്പണികൾ നടത്താതെ പൂർണ്ണ തകർച്ചയിൽ എത്തിയത്.
ഇരുവശങ്ങളിലേയും കൈവരികൾ തകർന്ന നിലയിലാണ്. കൊച്ചുകുട്ടികൾ ഉൾപ്പെടെ ദിവസേന നിരവധി നാട്ടുകാരും വിദ്യാർത്ഥികളും ഈ പാലം ആശ്രയിച്ചാണ് യാത്ര ചെയ്യുന്നത്. മഴക്കാലത്തെ യാത്ര പാലത്തിന്റെ അപകടസാധ്യത ഉയരുന്ന സാഹചര്യമാണുള്ളത്. രാത്രി സമയങ്ങളിൽ വഴിവിളക്കിൻ്റെ അഭാവവും അപകട ഭീഷണി വർധിപ്പിക്കുന്നതായി നാട്ടുകാർ പറയുന്നു.
സ്കൂൾ തുറക്കാൻ ദിവസങ്ങൾ മാത്രം ശേഷിക്കെ ബന്ധപ്പെട്ട വകുപ്പുകൾ വിഷയത്തിൽ ഉടൻ ഇടപെട്ട് ജനങ്ങളുടെ സുരക്ഷ ഉറപ്പാക്കണമെന്നും അടിയന്തരമായി പാലത്തിന്റെ നവീകരണ പ്രവർത്തനങ്ങൾ ആരംഭിക്കണമെന്നും പ്രദേശവാസികൾ ആവശ്യപ്പെട്ടു.
