അടൂർ: എംസി റോഡിലെ അരമനപടിയിൽ അമിത വേഗത്തിലെത്തിയ കെഎസ്ആർടിസി സൂപ്പർ ഫാസ്റ്റ് ബസ് ചരക്കു ലോറിയിലും ടെംപോ ട്രാവലറിലും പിക്കപ് വാനിലും ഇടിച്ച് അപകടം. ബസിലുണ്ടായിരുന്ന 10 പേർക്ക് പരുക്കേറ്റു. ഗുരുതരമായി പരുക്കേറ്റ ബസ് ഡ്രൈവർ അടൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.
ടെംപോ ട്രാവലറിനെ മറികടന്നു വന്ന ബസ് എതിരെ വന്ന ചരക്ക് ലോറിയിൽ ഇടിച്ച ശേഷം നിയന്ത്രണം വിട്ട് തിരിഞ്ഞ് പിന്നിൽ വന്ന വാനിലും പിക്കപ്പിലും ഇടിക്കുകയായിരുന്നു. കോട്ടയത്തു നിന്ന് തിരുവനന്തപുരത്തേക്ക് പോകുകയായിരുന്നു ബസ്. പന്തളം ഭാഗത്തേക്ക് പോവുകയായിരുന്നു ചരക്ക് ലോറി. പരിക്കേറ്റവർക്ക് പ്രാഥമിക ചികിത്സ നൽകി.
