തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധി മറികടക്കാൻ നടപടികൾ വേഗത്തിലാക്കി കെഎസ്ഇബി. നാഷണൽ തെർമൽ പവർ കോർപ്പറേഷൻ, പവർ പൾസ് ട്രേഡിങ് സൊല്യൂഷൻ എന്നീ കമ്പനികളിൽ നിന്ന് വൈദ്യുതി വാങ്ങാനാണ് നീക്കം. ഇതുമായി ബന്ധപ്പെട്ട കെഎസ്ഇബിയുടെ അപേക്ഷ ഇന്ന് റഗുലേറ്ററി കമ്മീഷൻ പരിഗണിക്കും.
23100 മെഗാവാട്ട് വീതം വൈദ്യുതി ഇരു കമ്പനികളിൽ നിന്നും വാങ്ങാനാണ് കെഎസ്ഇബി അനുമതി തേടിയിരിക്കുന്നത്. യൂണിറ്റിന് 5.96 രൂപ നിരക്കിൽ രണ്ട് കമ്പനികളും 100 മെഗാവാട്ട് വീതം വൈദ്യുതി നൽകും. ഈ മാസം മുതൽ അടുത്ത വർഷം ജൂലൈ 14 വരെയാകും ഇരു കമ്പനികളും തമ്മിലുള്ള കരാർ കാലാവധി.
സംസ്ഥാനത്തെ ഗുരുതര വൈദ്യുതി പ്രതിസന്ധി കണക്കിലെടുത്ത് റഗുലേറ്ററി കമ്മീഷൻ ഇന്നു തന്നെ അനുമതി നൽകിയേക്കുമെന്നാണ് സൂചന. കടുത്ത ചൂടിനെ തുടർന്ന് വൈദ്യുതി ആവശ്യകത 500 മുതൽ 1000 മെഗാവാട്ട് വരെ വർധിച്ചതും പവർ എക്സ്ചേഞ്ചിൽ നിന്ന് ആവശ്യത്തിന് വൈദ്യുതി ലഭിക്കാത്തതുമായിരുന്നു നിയന്ത്രണത്തിന് കാരണം.
