കൊല്ലം : കൊല്ലത്ത് വീണ്ടും ലോക്കപ്പ് പൂട്ടാൻ പൊലീസുകാർ മറന്നതിനെ തുടർന്ന് കഞ്ചാവ് കേസ് പ്രതി സ്റ്റേഷനിൽ നിന്ന് ഇറങ്ങിപ്പോയി.അഷ്ടമുടി കൽപ്പടിക്കൽ സ്വദേശി അബ്ദുൽ സലാം(37) ആണ് കൊല്ലം റെയിൽവേ പൊലീസ് സ്റ്റേഷനിൽനിന്നു ചാടിപ്പോയത്.മോഷണം, കഞ്ചാവ് കടത്തൽ തുടങ്ങിയ നിരവധി കേസുകളിൽ പ്രതിയാണ് ഇയാൾ.
ഞായറാഴ്ച റെയിൽവേ സ്റ്റേഷൻ പരിസരത്തുനിന്ന് കഞ്ചാവുമായാണ് അബ്ദുൾ സലാമിനെ പിടികൂടിയത്.തിങ്കളാഴ്ച ഉച്ചയ്ക്ക് 12.50ഓടെയാണ് ലോക്കപ്പിന്റെ കുറ്റി തുറന്ന് പ്രതി സ്റ്റേഷനിൽ നിന്ന് രക്ഷപ്പെട്ടത്.ഈ മാസം ഇത് രണ്ടാം തവണയാണ് ജില്ലയിൽ ലോക്കപ്പ് പൂട്ടാൻ മറന്നതിനെത്തുടർന്ന് പ്രതി ചാടിപ്പോകുന്നത്.
