കോട്ടയം: മലങ്കര സുറിയാനി ക്രിസ്ത്യാനി അസോസിയേഷൻ നടത്തിപ്പുമായി ബന്ധപ്പെട്ട ആദ്യയോഗം നാളെ മുളന്തുരുത്തി മാർത്തോമ്മൻ പള്ളിയിൽ ചേരും. ഉച്ചയ്ക്ക് 3 മണിക്ക് ചേരുന്ന യോഗത്തിന് മലങ്കരസഭാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ അധ്യക്ഷത വഹിക്കും.
മെത്രാപ്പോലീത്താമാർ, സഭാ സ്ഥാനികൾ, വർക്കിംഗ് കമ്മിറ്റി അംഗങ്ങൾ, കൊച്ചി, അങ്കമാലി, കണ്ടനാട് ഈസ്റ്റ് , കണ്ടനാട് വെസ്റ്റ് ഭദ്രാസനങ്ങളിൽ നിന്നുള്ള സഭാ മാനേജിംഗ് കമ്മിറ്റി – ഭദ്രാസന കൗൺസിൽ അംഗങ്ങൾ, മുളന്തുരത്തി മാർത്തോമ്മൻ പള്ളി, വെട്ടിക്കൽ ദയറാ, തേവനാൽ മാർ ബഹനാം പളളി എന്നിവങ്ങളിൽ നിന്നുള്ള പ്രതിനിധികൾ സംബന്ധിക്കുമെന്ന് അസോസിയേഷൻ സെക്രട്ടറി അഡ്വ.ബിജു ഉമ്മൻ അറിയിച്ചു.
സഭയ്ക്ക് പുതുതായി നാല് മെത്രാപ്പോലീത്താമാരെ തിരഞ്ഞെടുക്കുന്നതിനായാണ് 2026 ഓഗസ്റ്റ് 27 ന് മലങ്കര സുറിയാനി ക്രിസ്ത്യാനി അസോസിയേഷൻ യോഗം ചേരുന്നത്. മുളന്തുരുത്തി സുന്നഹദോസിന്റെയും പരിശുദ്ധ പരുമല തിരുമേനിയുടെ മേൽപ്പട്ട സ്ഥാനാരോഹണത്തിന്റെയും 150 ാം വാർഷിക വേളയിലാണ് മുളന്തുരുത്തി വീണ്ടും ചരിത്രനിയോഗത്തിന് വേദിയാകുന്നത്.
