പത്തനംതിട്ട: ശ്രീകൃഷ്ണ ജയന്തി ആഘോഷത്തിൽ നാട് ഇന്ന് അമ്പാടിയാകും. ബാലഗോകുലങ്ങളുടെയും വിവിധ ക്ഷേത്രങ്ങളുടെയും നേതൃത്വത്തിൽ ജില്ലയിലെ വിവിധ പ്രദേശങ്ങളിൽ വിപുലമായ ആഘോഷങ്ങളും ശോഭായാത്രകളും നടക്കും. ഉണ്ണിക്കണ്ണന്മാരുടെയും രാധമാരുടെയും വേഷമണിഞ്ഞ കുട്ടികളും ഗോപികാ-ഗോപന്മാരുടെ വേഷമണിഞ്ഞവരും ശോഭായാത്രകളിൽ അണിനിരക്കും.
പത്തനംതിട്ട, കോന്നി, അടൂർ, പന്തളം, തിരുവല്ല, റാന്നി, കോഴഞ്ചേരി, മല്ലപ്പള്ളി, ഇരവിപേരൂർ, വടശേരിക്കര തുടങ്ങിയ മേഖലകളിൽ വിവിധ കേന്ദ്രങ്ങളിൽ നിന്ന് ശോഭായാത്രകൾ ആരംഭിക്കും. നിശ്ചലദൃശ്യങ്ങൾ, കൃഷ്ണലീലകളുടെ അവതരണം, ഭക്തിഗാനങ്ങൾ, വാദ്യമേളങ്ങൾ, ഉറിയടി തുടങ്ങിയവ ആഘോഷങ്ങൾക്ക് മാറ്റുകൂട്ടും.
റാന്നിയിൽ നിരവധി കേന്ദ്രങ്ങളിൽനിന്നുള്ള ശോഭായാത്രകൾ വൈകുന്നേരം ഭഗവതിക്കുന്ന് ക്ഷേത്രപരിസരത്ത് സംഗമിച്ച് മഹാശോഭായാത്രയായി മാറും. തുടർന്ന് ഇട്ടിയപ്പാറ, മാമുക്ക്, പെരുമ്പുഴ വഴി രാമപുരം ക്ഷേത്രത്തിലേക്ക് ശോഭായാത്ര നീങ്ങും.
മല്ലപ്പള്ളി മേഖലയിൽ വിവിധ ഗ്രാമങ്ങളിൽനിന്നുള്ള ശോഭായാത്രകൾ വിവിധ കേന്ദ്രങ്ങളിൽ സംഗമിച്ച് ക്ഷേത്രസന്നിധികളിൽ സമാപിക്കും. കൃഷ്ണ-ഗോപികാ വേഷങ്ങളും അമ്പാടിയെയും വൃന്ദാവനത്തെയും അനുസ്മരിപ്പിക്കുന്ന നിശ്ചലദൃശ്യങ്ങളും ഇവിടെ പ്രധാന ആകർഷണമാകും.
കോഴഞ്ചേരി, ആറന്മുള മേഖലകളിലും ക്ഷേത്രകേന്ദ്രങ്ങളിൽ പ്രത്യേക പൂജകളും ഭജനകളും ആഘോഷ പരിപാടികളും നടക്കും. ആറന്മുള പാർത്ഥസാരഥി ക്ഷേത്രം ഉൾപ്പെടെയുള്ള പ്രധാന ക്ഷേത്രങ്ങളിൽ അഷ്ടമിരോഹിണിയോടനുബന്ധിച്ച് ഭക്തർ എത്തും.
പത്തനംതിട്ട നഗരത്തിലും കോന്നി, അടൂർ, പന്തളം മേഖലകളിലും ബാലഗോകുലങ്ങളുടെ നേതൃത്വത്തിൽ വിവിധ പരിപാടികൾ സംഘടിപ്പിച്ചിട്ടുണ്ട്. വീടുകളിലും കൃഷ്ണന്റെ പാദചിഹ്നങ്ങൾ വരച്ചും കുട്ടികളെ ഉണ്ണിക്കണ്ണന്റെ വേഷത്തിൽ അണിയിച്ചും ജയന്തി ആഘോഷിക്കും.
ജില്ലയിലെ പ്രധാന ശ്രീകൃഷ്ണ ക്ഷേത്രങ്ങളിൽ പ്രത്യേക പൂജകൾ, അഭിഷേകം, നിവേദ്യം, ഭജന, ഭാഗവതപാരായണം, ദീപാരാധന എന്നിവ നടക്കും. പല ക്ഷേത്രങ്ങളിലും രാത്രിയിൽ ജന്മപൂജയും പ്രത്യേക ചടങ്ങുകളും ഉണ്ടാകും. കുട്ടികളുടെ വലിയ പങ്കാളിത്തമാണ് ഇത്തവണത്തെ ആഘോഷത്തിന്റെ പ്രധാന പ്രത്യേകത. മതസൗഹാർദത്തിന്റെയും സാഹോദര്യത്തിന്റെയും സന്ദേശം ഉയർത്തിപ്പിടിച്ചാണ് വിവിധ കേന്ദ്രങ്ങളിൽ ആഘോഷങ്ങൾ സംഘടിപ്പിക്കുന്നത്
ശ്രീകൃഷ്ണ ജയന്തിയോടനുബന്ധിച്ച് വൈകുന്നേരത്തോടെ ജില്ലയിലെ പ്രധാന റോഡുകളിൽ ശോഭായാത്രകൾ കടന്നുപോകുന്നതിനാൽ ഗതാഗത നിയന്ത്രണത്തിനും തിരക്ക് ഒഴിവാക്കുന്നതിനുമുള്ള ക്രമീകരണങ്ങൾക്കായി പൊലീസിൻ്റെ സേവനം ഉണ്ടാകും.
