റാന്നി : മൊബൈൽ ഫോൺ വാങ്ങി നൽകാത്തതിൽ പ്രതിഷേധിച്ച് പ്ലസ്ടു വിദ്യാർഥി പമ്പാ നദിയിൽ ചാടി ആത്മഹത്യയ്ക്ക് ശ്രമിച്ചു. വെള്ളം കുറവായതിനാൽ ഒടുവിൽ വിദ്യാർഥി തന്നെ നീന്തി കരയ്ക്ക് കയറി. അങ്ങാടി സ്വദേശിയായ വിദ്യാർഥിയാണ് ഇന്ന് വൈകിട്ട് റാന്നി വലിയ പാലത്തിൽ നിന്ന് നദിയിലേക്ക് ചാടിയത്. സൈക്കിളിൽ വന്ന വിദ്യാർഥി പാലത്തിൻ്റെ മധ്യത്തിൽ എത്തിയപ്പോൾ സൈക്കിൾ വച്ച ശേഷം വെള്ളത്തിലേക്ക് ചാടുകയായിരുന്നുവെന്ന് പാലത്തിൽ ഉണ്ടായിരുന്നവർ പറഞ്ഞു.
നദിയിൽ വെള്ളം കുറവായതിനാൽ വിദ്യാർഥി ഒഴുക്കിൽപ്പെട്ടില്ല. ഉടൻ തന്നെ കരയിലേക്ക് നീന്തി എത്തുകയും ചെയ്തു. സ്ഥലത്ത് എത്തിയവർ കുട്ടിയെ പിടിച്ചു കയറ്റി റാന്നി താലൂക്ക് ആശുപത്രിയിൽ പ്രവേശിപ്പിച്ചു. വിവരമറിഞ്ഞ് കുട്ടിയുടെ മാതാപിതാക്കളും ആശുപത്രിയിൽ എത്തി. റാന്നി പൊലീസ് വിവരങ്ങൾ ശേഖരിച്ചു.
