കോട്ടയം: പനച്ചിക്കാട് ദക്ഷിണമൂകാംബി ക്ഷേത്രത്തിലെ നവരാത്രി കലോപാസന മൂന്നാം ദിനമായ വെള്ളിയാഴ്ചയും ഭക്തിസാന്ദ്രമായി. നൂറുകണക്കിന് കലാകാരന്മാർ പങ്കെടുക്കുന്ന കലോപാസനയിൽ തലശ്ശേരി വൈഖരി ഭജൻസ് ഫ്യൂഷൻ ബാൻഡിന്റെ ഭക്തിസംഗീതാവതരണവും പനച്ചിക്കാട് വൈഷ്ണവിയുടെ നൃത്താവതരണവും ശ്രദ്ധേയമായി.
24 മണിക്കൂറും ഇടവേളകളില്ലാതെ തുടരുന്ന കലോപാസനയിൽ ശാസ്ത്രീയ നൃത്തങ്ങളും സംഗീതപരിപാടികളും ശനിയാഴ്ചയും അരങ്ങേറും. ഞായറാഴ്ച (11) നവരാത്രി പൂജകൾക്കൊപ്പം ദേശീയ നൃത്തസംഗീതോത്സവത്തിനും തുടക്കമാകും. വൈകിട്ട് ഏഴിന് മംഗലാപുരത്തുനിന്നുള്ള പ്രശസ്ത കർണാടക സംഗീതജ്ഞൻ അനീഷ് ഭട്ടിന്റെ സംഗീതക്കച്ചേരിയോടെയാണ് ദേശീയ നൃത്തസംഗീതോത്സവം ആരംഭിക്കുന്നത്.
