കൊൽക്കത്ത : ബംഗാളിലെ മുർഷിദാബാദിൽ ട്രെയിൻ സ്കൂൾ വാനിലിടിച്ച് 3 പേർക്ക് ദാരുണാന്ത്യം.വാൻ ഡ്രൈവറും രണ്ട് വിദ്യാർഥികളുമാണ് മരിച്ചത് .അപകടത്തിൽ നിരവധി വിദ്യാർഥികൾക്ക് പരുക്കേറ്റിട്ടുണ്ട്. രാവിലെ ഏഴ് മണിയോടെ ബഹറംപൂർ മേഖലയിലെ കർണസുബർണ റെയിൽവേ ക്രോസിങ്ങിൽ വിദ്യാർഥികളുമായി പോയ സ്കൂൾ വാനിലേക്ക് പാസഞ്ചർ ട്രെയിൻ ഇടിച്ചു കയറുകയായിരുന്നു.
ഒരു ട്രെയിൻ കടന്നുപോയതിന് ശേഷം ലെവൽ ക്രോസ് ഗേറ്റ് തുറന്ന സമയത്താണ് തൊട്ടടുത്ത ട്രാക്കിലൂടെ മറ്റൊരു ട്രെയിൻ കടന്നുവന്നത്. ഗേറ്റ് വാച്ചറുടെ അശ്രദ്ധയാണ് അപകടത്തിന് കാരണമായതെന്നാണ് പ്രാഥമിക നിഗമനം. പരുക്കേറ്റ വിദ്യാർഥികളെ ഉടൻ മുർഷിദാബാദ് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
