ഓണത്തിനു ഒരുക്കാം വിളവിന്റെ വിസ്മയം’ പദ്ധതിക്ക് തുടക്കമായി

ആലപ്പുഴ : സംസ്ഥാന കൃഷി വകുപ്പ് നടപ്പാക്കുന്ന സമഗ്ര പച്ചക്കറി കൃഷിയജ്ഞം 2026–27 ഭാഗമായ ആലപ്പുഴ മുനിസിപ്പാലിറ്റി കൃഷിഭവന്റെ “ഓണത്തിനു ഒരുക്കാം വിളവിന്റെ വിസ്മയം” പദ്ധതി ജില്ലാ കളക്ടർ ഷാജി വി. നായർ ഉദ്ഘാടനം ചെയ്തു. ജില്ലാ കളക്ടറുടെ ഔദ്യോഗിക വസതിയിൽ പച്ചക്കറി തൈകൾ നട്ടാണ് ഉദ്ഘാടനം നിർവഹിച്ചത്.

ആദ്യഘട്ടത്തിൽ 100 മൺചട്ടികളിൽ വെണ്ട, വഴുതന, മുളക്, തക്കാളി എന്നിവയാണ് കൃഷി ചെയ്യുന്നത്. ജില്ലാ കളക്ടറുടെ കുടുംബാംഗങ്ങളും ചടങ്ങിൽ പങ്കാളികളായി.നഗരപ്രദേശങ്ങളിലും പരിമിതമായ സ്ഥലങ്ങളിലും പച്ചക്കറി കൃഷി ഫലപ്രദമായി നടത്തി ഓണത്തിന് ആവശ്യമായ വിഷരഹിത പച്ചക്കറികൾ വീടുകളിൽ തന്നെ ഉൽപാദിപ്പിക്കുക എന്ന സന്ദേശം ജനങ്ങളിലേക്ക് എത്തിക്കുകയെന്ന ലക്ഷ്യത്തോടെയാണ് പദ്ധതി നടപ്പാക്കുന്നത്.