റാന്നി : റാന്നി തോട്ടമൺകാവ് ഭഗവതീക്ഷേത്രത്തിൽ സംഘടിപ്പിക്കുന്ന അംബായാഗം 2026-ന് മുന്നോടിയായി വിവിധ പുണ്യസങ്കേതങ്ങളിൽ നിന്നുള്ള വിശേഷാൽ പ്രയാണ രഥങ്ങൾ പര്യടനം ആരംഭിച്ചു. മലയാലപ്പുഴ ദേവീക്ഷേത്രത്തിൽ നിന്നുള്ള രഥയാത്ര രാവിലെ 9 മണിക്ക് ഭക്തിനിർഭരമായ ചടങ്ങുകളോടെ യാത്ര ആരംഭിച്ചു.
ചരിത്രപ്രസിദ്ധമായ പരുമല പനയനാർകാവ് ദേവീക്ഷേത്രത്തിൽ നിന്നുള്ള രഥയാത്രയും, തിരുവല്ല മുത്തൂർ ശ്രീ മുത്തൂരാൻ കാവ് പ്രദേശത്ത് നിന്നുള്ള രഥയാത്രയും അതത് കേന്ദ്രങ്ങളിൽ നിന്നും പ്രയാണം തുടങ്ങി. നാടിന്റെ വിവിധ ഭാഗങ്ങളിൽ പര്യടനം നടത്തുന്ന ഈ മൂന്ന് മഹാ രഥങ്ങളും വൈകുന്നേരം 5 മണിക്ക് റാന്നി ഇട്ടിയപ്പാറ ജംഗ്ഷനിൽ എത്തിച്ചേരും.
തുടർന്ന് ഇട്ടിയപ്പാറയിൽ നിന്നും കൈകളിൽ ദീപമേന്തി, കേരളീയ പരമ്പരാഗത വേഷവിധാനങ്ങളായ സെറ്റും സാരിയും അണിഞ്ഞ ആയിരക്കണക്കിന് അമ്മമാരും ഭക്തജനങ്ങളും അണിനിരക്കുന്ന മഹാ സംയുക്ത രഥയാത്രയും ശോഭായാത്രയും തോട്ടമൺകാവ് ഭഗവതീക്ഷേത്ര സന്നിധിയിലേക്ക് ആനയിക്കപ്പെടും. വൈകീട്ട് ക്ഷേത്രാങ്കണത്തിൽ എത്തിച്ചേരുന്ന രഥങ്ങളെ ദീപക്കാഴ്ചകളോടെയും നാമസങ്കീർത്തനങ്ങളോടെയും എതിരേൽക്കും. തുടർന്ന് വിശേഷാൽ ദീപാരാധന, പുഷ്പാഞ്ജലി, മഹാപ്രസാദ വിതരണം എന്നിവ ഉണ്ടാകും.
