ആലപ്പുഴ: പശ്ചിമബംഗാളിലെ നന്ദിഗ്രാം നിയമസഭ ഉപതെരഞ്ഞെടുപ്പിൽനിന്ന് കോൺഗ്രസ് സ്ഥാനാർഥിയെ പിൻവലിക്കില്ലെന്നും മിലൻപ്രധാന്റെ അറസ്റ്റ് ദേശീയപ്രശ്നമായി ഉയർത്തുമെന്നും എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ. ആലപ്പുഴയിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.2007ലെ നന്ദിഗ്രാം ഭൂമി ഏറ്റെടുക്കൽ പ്രക്ഷോഭവുമായി ബന്ധപ്പെട്ട കേസിലാണ് കോൺഗ്രസ് സ്ഥാനാർഥി മിലൻ പ്രധാനെ അറസ്റ്റ് ചെയ്തത്.
നന്ദിഗ്രാം ഉപതെരഞ്ഞെടുപ്പിൽ കോൺഗ്രസ് സ്ഥാനാർഥിക്ക് തൃണമൂൽ കോൺഗ്രസ് അധ്യക്ഷ മമത ബാനർജി പിന്തുണ പ്രഖ്യാപിച്ചതിന് മണിക്കൂറുകൾക്ക് ശേഷമാണ് പൊലീസ് പിടികൂടിയത്. നേരത്തെ ടി.എം.സി സ്ഥാനാർഥിയെ നിർബന്ധിപ്പിച്ച് പിൻവലിച്ചു. കോൺഗ്രസ് സ്ഥാനാർഥിയെ കള്ളകേസിൽപെടുത്തി അകത്താക്കുന്നത് എവിടുത്തെ ന്യായമാണ്.
മത്സരത്തിൽനിന്ന് പിന്മാറിയാൽ കേസുകൾ ഒഴിവാക്കാമെന്നാണ് പറയുന്നത്. ഇതാണോ രാജ്യത്ത് നിലനിൽക്കുന്ന ജനാധിപത്യം. മുതിർന്ന നേതാക്കൾ എല്ലാം അവിടെ പ്രചാരണത്തിന് പോകുമെന്നും അദ്ദേഹം വ്യക്തമാക്കി.
