കോട്ടയം: ഓപ്പറേഷൻ തൂഫാന്റെ ഭാഗമായി ജില്ലാ പൊലീസിന്റെ ലഹരി വിരുദ്ധ സംഘം നടത്തിയ പരിശോധനയിൽ 2.200 കിലോ കഞ്ചാവുമായി കാഞ്ഞിരപ്പള്ളിയിൽ വെസ്റ്റ് ബംഗാൾ സ്വദേശി പിടിയിൽ. കാഞ്ഞിരപ്പള്ളി കൂവപ്പള്ളിയിൽ താമസിക്കുന്ന വെസ്റ്റ് ബംഗാൾ മൂർഷിദാബാദ് സ്വദേശി ജഹീദുൽ ഇസ്ലാമിനെയാണ് (22) ജില്ലാ പൊലീസ് മേധാവിയുടെ ലഹരി വിരുദ്ധ സംഘവും കാഞ്ഞിരപ്പള്ളി പൊലീസും ചേർന്ന് പിടികൂടിയത്.
ഇന്ന് രാവിലെയായിരുന്നു കേസിനാസ്പദമായ സംഭവം. ജഹീദുള്ളിന് ലഹരി ഇടപാടുകളുള്ളതായി ജില്ലാ പൊലീസ് മേധാവി കെ.എം സാബു മാത്യുവിന് രഹസ്യ വിവരം ലഭിച്ചിരുന്നു. ഇതിന്റെ അടിസ്ഥാനത്തിൽ കാഞ്ഞിരപ്പള്ളി ഡിവൈ.എസ്.പി റിജോ പി.ജോസിന്റെയും നർക്കോട്ടിക് സെൽ ഡിവൈഎസ്പി യു.ശ്രീജിത്തിന്റെയും നേതൃത്വത്തിൽ ഇയാളെ രഹസ്യമായി നിരീക്ഷിച്ച് വരികയായിരുന്നു.
ഇന്ന് രാവിലെയോടെ ഇയാൾ വെസ്റ്റ് ബംഗാളിൽ നിന്നും കാഞ്ഞിരപ്പള്ളി കുരിശ് കവലയിൽ വന്നിറങ്ങിയത്. തുടർന്ന് പൊലീസ് സംഘം ഇയാളെ കസ്റ്റഡിയിൽ എടുത്ത് നടത്തിയ ചോദ്യം ചെയ്യലിലും, ദേഹ പരിശോധനയിലും ഇയാളുടെ പക്കൽ നിന്നും കഞ്ചാവ് കണ്ടെത്തി. പ്രതിയെ കോടതിയിൽ ഹാജരാക്കി റിമാന്റ് ചെയ്തു.
