ന്യൂഡൽഹി: തെലുങ്ക് സൂപ്പർതാരങ്ങളായ ചിരഞ്ജീവിയും മകൻ രാം ചരണും കേന്ദ്ര ആഭ്യന്തര മന്ത്രി അമിത് ഷായുമായി കൂടിക്കാഴ്‌ച്ച നടത്തി . തിങ്കളാഴ്ച ഹൈദരാബാദിലെ വസതിയിലായിരുന്നു കൂടിക്കാഴ്ച. കേന്ദ്ര മന്ത്രി ജി കിഷൻ റെഡ്ഡിയും കൂടിക്കാഴ്ചയിൽ സന്നിഹിതനായി. കൂടിക്കാഴ്ചക്ക് ശേഷം രാം ചരൺ ഇൻസ്റ്റഗ്രാമിലൂടെ വിവരങ്ങൾ പങ്കുവെച്ചു.
കേന്ദ്ര ആഭ്യന്തര മന്ത്രിയെ കാണാൻ കഴിഞ്ഞതിൽ അഭിമാനമുണ്ടെന്ന് രാം ചരൺ കുറിച്ചു. ‘ബഹുമാനപ്പെട്ട കേന്ദ്ര ആഭ്യന്തര മന്ത്രി ശ്രീ അമിത് ഷാ ജിയെ എന്റെ പിതാവ് ശ്രീ ചിരഞ്ജീവിക്കൊപ്പം ഇന്ന് കാണാൻ കഴിഞ്ഞതിൽ അഭിമാനമുണ്ട്’ റാം ചരൺ ഇൻസ്റ്റഗ്രാമിൽ കുറിച്ചു. ചിരഞ്ജീവിയും റാം ചരണും അമിത് ഷായെ സ്വീകരിക്കുന്നതിന്റെ ചിത്രങ്ങളും താരം പുറത്തുവിട്ടു.
പൂച്ചെണ്ടും മഹാവിഷ്ണു വിഗ്രഹവും പരമ്പരാഗത ഷാളും നൽകിയാണ് ഇരുവരും അമിത് ഷായെ ആദരിച്ചത്. എഐയുടെയും ഡീപ്ഫേക്ക് സാങ്കേതിക വിദ്യകളുടെയും വർധിച്ചുവരുന്ന ദുരുപയോഗത്തെക്കുറിച്ചും അവ കലാകാരന്മാരിലും ഞങ്ങളുടെ വ്യവസായത്തിലും ചെലുത്തുന്ന ഗുരുതരമായ പ്രത്യാഘാതങ്ങളെക്കുറിച്ചുള്ള ഞങ്ങളുടെ ആശങ്കകളോടുള്ള അദ്ദേഹത്തിന്റെ ധാരണയും പോസിറ്റീവ് പ്രതികരണവും എന്നെ പ്രോത്സാഹിപ്പിക്കുന്നു’ എന്നും രാം ചരൺ കുറിച്ചു.
വിഷയം സർക്കാർ അടിയന്തരമായി പരിശോധിക്കുമെന്നും ശക്തമായ സുരക്ഷാ നടപടികളും സ്വീകരിക്കാൻ പ്രവർത്തിക്കുമെന്നും അമിത് ഷാ ഉറപ്പ് നൽകിയതായി രാം ചരൺ വ്യക്തമാക്കി.
