കോട്ടയം: ജില്ലയിൽ ലഹരി വസ്തുക്കൾക്കും സാമൂഹ്യവിരുദ്ധ പ്രവർത്തനങ്ങൾക്കുമെതിരെ കേരള പോലീസ് ശക്തമായി നടപ്പാക്കുന്ന ഓപ്പറേഷൻ തൂഫാന്റെ ഭാഗമായി പായിപ്പാട് മേഖലയിൽ നടത്തിയ പരിശോധനയിൽ 1.190 കിലോഗ്രാം കഞ്ചാവുമായി ഒരാളെ തൃക്കൊടിത്താനം പോലീസ് അറസ്റ്റ് ചെയ്തു.
നാലുകോടി കൂടത്തേട്ട് വടക്കേപറമ്പിൽ വീട്ടിൽ ബിനു കുര്യാക്കോസ് (പാപ്പൻ ബിനു) അനധികൃതമായി കഞ്ചാവ് സൂക്ഷിച്ചുവെച്ച് വിൽപ്പന നടത്തുന്നതായി ലഭിച്ച രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് പ്രതി പിടിയിലായത്. നിരവധി ക്രിമിനൽ കേസുകളിലെ പ്രതിയും തൃക്കൊടിത്താനം പോലീസ് സ്റ്റേഷനിലെ ആന്റി സോഷ്യലുമാണ് .
കോട്ടയം ജില്ലാ പോലീസ് മേധാവി കെ എം സാബു മാത്യു ഐ പി എസ് ന്റെ നിർദ്ദേശപ്രകാരം, ചങ്ങനാശ്ശേരി ഡിവൈ.എസ്.പി അഷാദിന്റെ നേതൃത്വത്തിൽ ഇൻസ്പെക്ടർ അനീഷ് ബി, എസ്.ഐ. അജീഷ്, എ.എസ്.ഐ. ഷീജ, ടാനിയ, മണികണ്ഠൻ, ബിജു എന്നിവരടങ്ങിയ പോലീസ് സംഘമാണ് പ്രതിയെ അറസ്റ്റ് ചെയ്തത്. ഇയാളിൽ നിന്നും 1.190 കിലോഗ്രാം കഞ്ചാവ് കണ്ടെടുത്തു. തുടർനടപടികൾക്ക് ശേഷം പ്രതിയെ കോടതിയിൽ ഹാജരാക്കും
