ശബരിമല: സന്നിധാനത്തിന്റെ പരിസരത്തുള്ള പന്നിശല്യം നിയന്ത്രിക്കുന്നതിനുള്ള നടപടികൾ ഊർജിതമാക്കണമെന്നു സന്നിധാനം സ്പെഷൽ ഓഫീസർ ബി. കൃഷ്ണകുമാറിന്റെ അധ്യക്ഷതയിൽ ചേർന്ന വിവിധ വകുപ്പുകളുടെ ഉന്നതതല അവലോകനയോഗത്തിൽ വനം വകുപ്പിന് നിർദേശം.
കാട്ടുപന്നികൾ അയ്യപ്പഭക്തർക്കു ശല്യം സൃഷ്ടിക്കുന്നതായി പരാതി ഉയർന്ന സ്ഥലങ്ങളിൽ വൈകിട്ട് ആറുമണിമുതൽ രണ്ടു യൂണിറ്റ് പട്രോളിങ് സംഘത്തെ നിയോഗിച്ചതായി യോഗത്തിൽ പങ്കെടുത്ത വനംവകുപ്പ് ഉദ്യോഗസ്ഥർ അറിയിച്ചു. വിരിവയ്ക്കുന്ന സ്ഥലങ്ങളിൽ അയ്യപ്പന്മാർക്ക് മാർഗനിർദേശം നൽകുന്നതിനുള്ള നടപടികൾ സ്വീകരിച്ചിട്ടുണ്ടെന്നും വനംവകുപ്പ് ഉദ്യോഗസ്ഥർ അറിയിച്ചു.
സന്നിധാനത്തെ അടിപ്പാതയിലെ അറ്റകുറ്റപ്പണികൾ നട അടച്ചാലുടൻ വേഗത്തിൽ പൂർത്തിയാക്കുമെന്ന് ദേവസ്വം മരാമത്ത് യോഗത്തിൽ അറിയിച്ചു. ചന്ദ്രാനന്ദൻ റോഡിൽ അപകടകരമായ രീതിയിൽ മരക്കമ്പ് ഉണങ്ങിനിൽക്കുന്നത് നീക്കം ചെയ്യാൻ വനം, അഗ്നിരക്ഷാ വകുപ്പുകൾക്കു നിർദേശം നൽകി. ഭസ്മക്കുളത്തിന്റെ ക്ളോറിനേഷൻ നടപടികൾ ശക്തമാക്കിയതായി പരിസ്ഥിതി എൻജിനീയർ അറിയിച്ചു. വിവിധ വകുപ്പുകളുടെ ഉദ്യോഗസ്ഥർ യോഗത്തിൽ പങ്കെടുത്തു.
