റാന്നി : റാന്നിയിൽ വീട്ടിലെ റബർ പുകപ്പുരയ്ക്ക് തീപിടിച്ചു. അഗ്നിശമന സേനയുടേയും പൊലീസിൻ്റെയും സമയോചിത ഇടപെടലിലൂടെ വൻ ദുരന്തം ഒഴിവായി. മന്ദമരുതി -വെച്ചൂച്ചിറ റോഡിൽ കുന്നം ആനമാടത്തിന് സമീപം തെക്കേൽ സാബുവിൻ്റെ വീട്ടിലെ പുകപ്പുരയിലാണ് തീ പടർന്നത്. ഇന്ന് ഉച്ചയ്ക്ക് 12.45 നായിരുന്നു സംഭവം
ഈ സമയം സാബുവിൻ്റെ വീട്ടിൽ ആരുമുണ്ടായിരുന്നില്ല. വീടിന് സമീപത്ത് കൂടി പോയവരാണ് പുകപ്പുരയിൽ നിന്ന് ഉയർന്ന തോതിൽ തീ ഉയരുന്നതായി കണ്ടത്. ഉടൻ തന്നെ ഫയർ ഫോഴ്സിലും പൊലീസിലും വിവരം അറിയിച്ചതിനെ തുടർന്ന് അവർ എത്തി തീ നിയന്ത്രണ വിധേയമാക്കി. വെച്ചുച്ചിറ പൊലീസും റാന്നിയിൽ നിന്നുള്ള ഫയർ ഫോഴ്സ് യൂണിറ്റുമാണ് എത്തിയത്. ഒട്ടുപാൽ പൂർണമായും കത്തി നശിച്ചു
