തിരുവല്ല: ചരിത്രമുന്നേറ്റത്തിന് കരുത്തായി കൂടെ നിന്ന വോട്ടർമാർക്ക് നന്ദി പറഞ്ഞ് തിരുവല്ലയിലെ എൻഡിഎ സ്ഥാനാർത്ഥി അനൂപ് ആന്റണി. ഒപ്പം നിന്ന ജനതയോടുള്ള നന്ദിയും കടപ്പാടും അദ്ദേഹം ഫെയ്‌സ് ബുക്കിൽ കുറിച്ചു. തനിക്ക് ലഭിച്ച 43078 വോട്ടുകൾ വികസന രാഷ്ട്രീയത്തിനും ‘ഡബിൾ എൻജിൻ’ വികസന പ്ലാനിലും ജനങ്ങൾ നൽകിയ വിശ്വാസമാണ്.
തെരഞ്ഞെടുപ്പിലെ ജയപരാജയത്തിനപ്പുറം ഈ മണ്ണിൽ നമ്മൾ പടുത്തുയർത്തിയ ജനകീയ മുന്നേറ്റം വരും നാളുകളിൽ ഒരു വികസിത തിരുവല്ല യാഥാർത്ഥ്യമാക്കാനുള്ള കരുത്തായി മാറും. മാറ്റത്തിന്റെ ആ വലിയ ചുവടുവെപ്പിന് തുടക്കം കുറിച്ച ജനാവലിക്കൊപ്പം ഉറച്ച് നിൽക്കുമെന്നും അദ്ദേഹം ഫെയ്‌സ് ബുക്കിൽ കുറിച്ചു.
തിരുവല്ലയിലെ ഓരോരുത്തരുടെയും എല്ലാ ആവശ്യങ്ങൾക്കും കൂടെത്തന്നെയുണ്ടാകും. എംഎൽഎ ആയി തെരഞ്ഞെടുക്കപ്പെട്ട വർഗീസ് മാമ്മന് അഭിനന്ദനങ്ങളും ആശംസകളും അനൂപ് നേർന്നു.
