പത്തനംതിട്ട : നഗരസഭയിൽ മുണ്ടു കോട്ടക്കൽ ശ്രീനാരായണ ശതവത്സര മെമ്മോറിയൽ എൽ പി സ്കൂളിലെ മൂന്ന് ബൂത്തുകളിൽ വോട്ട് ചെയ്യാൻ ഭിന്ന ശേഷിക്കാർക്കും ശാരീരിക അവശത നേരിടുന്നവർക്കും ഇത്തവണയും ഡോളി തന്നെ ആശ്രയം. 4 ഡോളികളാണ് റോഡിൽ നിന്നും ഏറെ ഉയരത്തിലുള്ള ഈ സ്കൂളിൽ പ്രവർത്തിക്കുന്ന 3 ബൂത്തുകളിലേക്കായി ക്രമീകരിച്ചിരിക്കുന്നത്.
43 ഓളം പടിക്കെട്ടുകൾ കയറി വേണം വോട്ടർമാർക്ക് മുണ്ടുകോട്ടക്കൽ ശ്രീനാരായണ ശതവത്സര മെമ്മോറിയൽ എൽ പി സ്ക്കുളിലെ മുന്ന് ബൂത്തുകളിൽ എത്തിച്ചേരാൻ. ശാരീരിക അവശതകളുള്ളവർക്കും ഭിന്ന ശേഷിക്കാരുമായ വോട്ടർമാർക്ക് ബൂത്തിൽ എത്തിച്ചേരാൻ 4 ഡോളികളും 12 ചുമട്ടുകാരെയുമാണ് കോഴഞ്ചേരി താലൂക്ക് അധികൃതർ ഏർപ്പെടുത്തിയിട്ടുള്ളത്. പ്രദേശത്ത് ബൂത്ത് ക്രമീകരിക്കാൻ അനുയോജ്യമായ മറ്റിടങ്ങൾ ലഭ്യമല്ലാത്തതിനാലും സ്കൂൾ മുറ്റത്തേക്ക് വാഹനങ്ങൾ എത്തിക്കാൻ സാധിക്കാത്തതിനാലും ഏറെ കാലങ്ങളായി ശാരീരിക അവശതകൾ നേരിടുന്ന വോട്ടർമാർക്കായി ഡോളി സൗകര്യം ഏർപ്പെടുത്തിയത്.
