ഇടുക്കി : ഇടുക്കി ഗ്രാമ്പിയിൽ ജനവാസ മേഖലയിൽ ഇറങ്ങിയ കടുവയെ മയക്കുവെടി വയ്ക്കും. ഇതിന്റെ ഭാഗമായി വണ്ടിപ്പെരിയാര് പഞ്ചായത്തിലെ 15ാം വാര്ഡിൽ നിരോധനാജ്ഞ പ്രഖ്യാപിച്ചു. ഇന്നു വൈകിട്ട് ആറുവരെയാണ് ജില്ലാ കലക്ടർ നിരോധനാജ്ഞ പുറപ്പെടുവിച്ചത്.
ഗ്രാമ്പി എസ്റ്റേറ്റിൻറെ പതിനാറാം ഡിവിഷനിലെ ചെറിയ കാട്ടിനുള്ളിലാണ് കടുവയുള്ളത്. കാലിന് ഗുരുതരമായ പരിക്കുള്ള കടുവ രണ്ട് ദിവസമായി ഇവിടെ തന്നെ കിടക്കുകയായിരുന്നു. രാവിലെ ഡ്രോൺ നിരീക്ഷണത്തിൽ കടുവയെ കണ്ടില്ലെന്നും ഇന്നലെയുണ്ടായിരുന്ന സ്ഥലത്തുനിന്നും കടുവ മാറിയിട്ടുണ്ടെന്നും ഫോറസ്ററ് ഓഫീസർ അറിയിച്ചു.
വനംകുപ്പ് വെറ്ററിനറി ഡോക്ടർമാരുടെ നേതൃത്വത്തിലുള്ള സംഘം മയക്കുവെടി വയ്ക്കാനായി എത്തിയിട്ടുണ്ട്. കാലിന് പരിക്കുള്ളതിനാൽ കടുവ തനിയെ നടന്ന് കൂട്ടിൽ കയറില്ലെന്നതിനാലാണ് മയക്കുവെടി വെച്ച് പിടികൂടാൻ തീരുമാനിച്ചത്.
