ആലപ്പുഴ: വേമ്പനാട് കായൽ പുനരുജ്ജീവനവുമായി ബന്ധപ്പെട്ട് ‘പ്ലാസ്റ്റിക് മുക്ത മെഗാ കാമ്പയിൻ’ മാർച്ച് രണ്ട് മുതൽ മാർച്ച് 31 വരെ ജില്ലയിൽ സംഘടിപ്പിക്കും. ഒരു മാസത്തെ ഈ പരിപാടി പൈലറ്റ് അടിസ്ഥാനത്തിൽ തണ്ണീർമുക്കം, മുഹമ്മ, മണ്ണഞ്ചേരി, ആര്യാട്, രാമങ്കരി എന്നീ അഞ്ച് പഞ്ചായത്തുകളിലും ആലപ്പുഴ നഗരസഭാ പരിധിയിലും വിപുലമായി നടത്തും. പദ്ധതിയുടെ ഔദ്യോഗിക ഉദ്ഘാടനം ജില്ലാ കളക്ടർ അലക്സ് വർഗീസ് മാർച്ച് രണ്ടിന് രാവിലെ 10-ന് രാമങ്കരി ബ്ലോക്ക് ജംഗ്ഷനിലും 11.30-ന് തണ്ണീർമുക്കം ബോട്ട് ജെട്ടിയിലും നിർവഹിക്കും.
2025-ൽ ആരംഭിച്ച വേമ്പനാട് പുനരുജ്ജീവന പ്രക്രിയയുടെ ഭാഗമായി, കായലിൽ നിന്നുള്ള പ്ലാസ്റ്റിക് മാലിന്യങ്ങൾ നീക്കം ചെയ്യുന്ന പ്രവർത്തനങ്ങളുടെ തുടർച്ചയായാണ് ഈ കാമ്പയിൻ സംഘടിപ്പിക്കുന്നത്.
