ആലപ്പുഴ: “ആലപ്പുഴ ആഘോഷിക്കും, ജനാധിപത്യത്തിന്റെ ഉത്സവം” സെല്‍ഫിയെടുക്കാനുള്ള നീണ്ട തിരക്കുകള്‍ക്കിടയില്‍ നജീബിന്റെ വാക്കുകള്‍ കൈയടിയോടെയാണ് കളക്ട്രേറ്റ് വരവേറ്റത്. വോട്ടര്‍ബോധവത്കരണ പരിപാടി ആലപ്പുഴയുടെ( സ്വീപ്പ് ) ഭാഗമായി ടാഗ് ലൈന്‍ പ്രകാശനത്തിന് എത്തിയതായിരുന്നു ആടുജീവിതത്തിലെ യഥാര്‍ത്ഥ നായകന്‍ നജീബ്. കളക്ടറേറ്റില്‍ എത്തിയ നജീബിനെ കുശലം പറഞ്ഞും വിശേഷങ്ങള്‍ തിരക്കിയും ജീവനക്കാരും പൊതുജനവും വട്ടം കൂടി. സൗദി അറേബ്യയിലെ മരുഭൂമിയില്‍ താന്‍ നേരിട്ട ദുരനുഭവങ്ങള്‍ ജില്ല കളക്ടറോടും ജീവനക്കാരുമായും പങ്കുവെച്ച നജീബ് ജനാധിപത്യ പ്രക്രിയയിലെ വോട്ടിന്റെ പ്രാധാന്യത്തെക്കുറിച്ചും സംസാരിച്ചു.
‘ആലപ്പുഴ ആഘോഷിക്കും, ജനാധിപത്യത്തിന്റെ ഉത്സവം’ എന്നതാണ് ആലപ്പുഴ സ്വീപ്പിന്റെ ഇത്തവണത്തെ ടാഗ് ലൈന്‍. കളക്ടറേറ്റ് കോണ്‍ഫറന്‍സ് ഹാളില്‍ നടന്ന ചടങ്ങില്‍ ജില്ല തിരഞ്ഞെടുപ്പ് ഓഫീസറും ജില്ല കളക്ടറുമായ അലക്സ് വര്‍ഗീസ്, സബ് കളക്ടര്‍ സമീര്‍ കിഷന്‍, ഡെപ്യൂട്ടി കളക്ടര്‍(എല്‍.എ.) മുഹമ്മദ് ഷാഫി, സ്വീപ്പ് നോഡല്‍ ഓഫീസറും ദാരിദ്ര ലഘൂകരണ വിഭാഗം പ്രൊജക്റ്റ് ഡയറക്ടറുമായ ഫിലിപ്പ് ജോസഫ്, എല്‍.എസ്.ജി.ഡി. അസിസ്റ്റന്റ് ഡയറക്ടര്‍ ശ്രീജിത്ത് തുടങ്ങിയവര്‍ പങ്കെടുത്തു.
