പത്തനംതിട്ട: കുപ്പിയിൽ പെട്രോൾ നൽകാത്തതിന് പെട്രോൾ പമ്പ് ജീവനക്കാരന് ക്രൂര മർദനം. ഓമല്ലൂരിലാണ് സംഭവം. പ്രക്കാനം സ്വദേശി രഞ്ജിത്തിനാണ് മർദനമേറ്റത്. രണ്ട് ബൈക്കുകളിലായി എത്തിയ ആറുപേരാണ് മർദിച്ചത്. കഴിഞ്ഞ 19-നാണ് പ്രതികൾ പെട്രോൾ വാങ്ങാനെത്തിയതെന്നും ചോദിച്ചിട്ട് നൽകാത്തതിനാൽ പിറ്റേ ദിവസം സംഘം ചേർന്നെത്തി അക്രമിക്കുകയായിരുന്നുവെന്നും രഞ്ജിത്ത് പറഞ്ഞു.
വന്ന ബെക്കിൽ പെട്രോൾ അടിച്ച ശേഷമാണ് കുപ്പിയിൽ വേണമെന്ന് ആവശ്യപ്പെട്ടത്. പമ്പിന്റെ പുറകിൽ കൊണ്ടുപോയി തലക്ക് ഹെൽമെറ്റുകൊണ്ട് അടിക്കയായിരുന്നു. ഷർട്ടും വലിച്ചുകീറി. രഞ്ജിത്ത് ജനറൽ ആശുപത്രിയിലാണ്. സ്ഥലത്ത് ഉണ്ടായിരുന്ന മറ്റൊരു ജീവനക്കാരനെയും മർദിക്കാൻ ശ്രമിച്ചു.
അക്രമത്തിന്റെ സിസിടിവി ദ്യശ്യങ്ങളും പുറത്തുവന്നിട്ടുണ്ട്. സംഘം മദ്യപിച്ചാണ് എത്തിയത്. സംഭവത്തിന്റെ തലേ ദിവസം കുപ്പിയിൽ പെട്രോൾ വേണമെന്ന് ആവശ്യപ്പെട്ടിരുന്നു. ഇതേചൊല്ലി അന്ന് വാക്കു തർക്കവും നടന്നു. പത്തനംതിട്ട പൊലീസിൽ പരാതി നൽകി.
