കവിയൂർ: തിരുവല്ല – മല്ലപ്പള്ളി- ചേലക്കൊമ്പ് റോഡിൻ്റെ പണികൾ വേഗത്തിൽ പൂർത്തിയാക്കാൻ മുൻഗണന നൽകുമെന്ന് നിയുക്ത തിരുവല്ല എംഎൽഎ അഡ്വ. വർഗീസ് മാമ്മൻ പറഞ്ഞു. കവിയൂർ, കുന്നന്താനം, മല്ലപ്പള്ളി, ആനിക്കാട് പഞ്ചായത്തുകളിലെ സ്വീകരണത്തിന് നന്ദി ചൊല്ലി പ്രസംഗിക്കുകയായിരുന്നു അദ്ദേഹം. സ്ഥലമെടുപ്പ് പൂർത്തിയായിട്ടും പണികൾ തുടങ്ങാൻ കഴിഞ്ഞിട്ടില്ല. ബന്ധപ്പെട്ടവരുടെ അനാസ്ഥയാണ് ഇതിനു കാരണം. സംസ്ഥാന പാതകൾ കഴിഞ്ഞാൽ ജില്ലയിലെ പ്രാധാന്യമുള്ള റോഡാണ് ഇതെന്ന് വർഗീസ് മാമ്മൻ പറഞ്ഞു. ആനിക്കാട് -കോട്ടാങ്ങൽ ശുദ്ധജല പദ്ധതി പൂർത്തിയാക്കാൻ നടപടി സ്വീകരിക്കുമെന്നും വർഗീസ് മാമ്മൻ പറഞ്ഞു.
കവിയൂർ പഞ്ചായത്തിലെ മനയ്ക്കച്ചിറയിൽ ഉദ്ഘാടന സമ്മേളനത്തിൽ മണ്ഡലം സെക്രട്ടറി രാജൻ മണ്ണാമുറി അധ്യക്ഷത വഹിച്ചു.ഡിസിസി സെക്രട്ടറി കോശി പി.സഖറിയ, കോൺഗ്രസ് ബ്ലോക്ക് പ്രസിഡൻ്റ് എബി മേക്കരിങ്ങാട്ട്, കേരള കോൺഗ്രസ് ഉന്നതാധികാര സമിതി അംഗം ജോൺസൻ കുര്യൻ, യൂത്ത് ഫ്രണ്ട് സംസ്ഥാന സെക്രട്ടറി വി.ആർ.രാജേഷ്, തോമസ് കോശി, ജേക്കബ് മാത്യു, ബെൻസി അലക്സ്, എലിസബത്ത് മാത്യു എന്നിവർ പ്രസംഗിച്ചു.
