തിരുവനന്തപുരം : ചിറയിൻകീഴിൽ കോംബോ ഓഫറിൽ ഷവർമയും ഷവായയും കഴിച്ച് 21 പേർക്ക് ഭക്ഷ്യവിഷബാധയേറ്റു .കടയ്ക്കാവൂർ തെക്കുംഭാഗം എസ്ആർവി എൽപി സ്കൂളിനു സമീപമുള്ള ‘സിഗ്നേച്ചർ ഡിഷസ്’ എന്ന സ്ഥാപനത്തിൽ നിന്നും തിങ്കളാഴ്ച രാത്രി ഭക്ഷണം കഴിച്ച 21 പേരാണ് ഛർദ്ദി, വയറിളക്കം എന്നിവയോടെ ആശുപത്രികളിൽ ചികിത്സ തേടിയത് .
ആകർഷകമായ കോംബോ ഓഫറുകളിൽ ഷവർമയും ഷവായിയും ലഭിക്കുമെന്ന പരസ്യം കണ്ടാണ് പലരും ഭക്ഷണം വാങ്ങിയതെന്ന് നാട്ടുകാർ പറഞ്ഞു.ഭക്ഷണം കഴിച്ച് മണിക്കൂറുകൾക്കകം തന്നെ പലർക്കും കടുത്ത ശാരീരിക അസ്വസ്ഥതകൾ അനുഭവപ്പെടുകയായിരുന്നു.നിലവിൽ ആരുടെയും ആരോഗ്യനില ഗുരുതരമല്ല .
സംഭവത്തെ തുടർന്ന് ഭക്ഷ്യസുരക്ഷാ വിഭാഗം സ്ഥലത്തെത്തി കട അടച്ചുപൂട്ടി. മതിയായ ലൈസൻസോ അനുമതികളോ ഇല്ലാതെയാണ് ഈ സ്ഥാപനം പ്രവർത്തിച്ചു വന്നിരുന്നതെന്ന് പ്രാഥമിക പരിശോധനയിൽ കണ്ടെത്തിയിട്ടുണ്ട്.
