പരുമല : പ്രാര്‍ത്ഥനാജീവിതത്തിലൂടെ ജീവിത വിശുദ്ധിയിലേക്ക് ഉയര്‍ന്ന പരിശുദ്ധനായ പരുമല തിരുമേനിയുടെ പെരുന്നാളില്‍ അഖണ്ഡ പ്രാര്‍ത്ഥന നടത്താന്‍ ക്രൈസ്തവ യുവജനപ്രസ്ഥാനത്തിന് ലഭിച്ച നിയോഗം ദൈവത്തിന്റെ കൃപയാണെന്ന് ഡോ. ഗീവർഗീസ് മാർ യൂലിയോസ് മെത്രാപ്പോലീത്ത. പ്രാര്‍ത്ഥനാജീവിതത്തിലൂടെ മാത്രമേ ദൈവീകരാകുവാന്‍ കഴിയുകയുള്ളു എന്നും, യുവജനങ്ങള്‍ വേദവായനയിലും, പ്രാര്‍ത്ഥനാജീവിതത്തിലും ഉത്സാഹം ഉള്ളവരാകണമെന്നും മെത്രാപ്പോലീത്ത ഓര്‍മ്മിപ്പിച്ചു.
വൈദീക ട്രസ്റ്റീ ഫാ. ഡോ.തോമസ് വര്‍ഗീസ് അമയില്‍, അത്മായ ട്രസ്റ്റി റോണി വര്‍ഗീസ് എബ്രഹാം, അസോസിയേഷന്‍ സെക്രട്ടറി അഡ്വ. ബിജു ഉമ്മന്‍, കേന്ദ്ര വൈസ് പ്രസിഡന്റ് ഫാ. ജെയിന്‍ സി മാത്യു, ട്രഷറാര്‍ രഞ്ജു എം. ജോയ്, കണ്‍വീനര്‍ രോഹിത് കൊച്ചുതെക്കേതില്‍, റീജിയണല്‍ സെക്രട്ടറിമാരായ അബു എബ്രഹാം വീരപ്പള്ളില്‍, ജിന്‍സ് തടത്തില്‍, റീജന്‍ യോഹന്നാന്‍ എന്നിവര്‍ പ്രസംഗിച്ചു. സഭാ മാനേജിങ് കമ്മിറ്റി അംഗങ്ങള്‍, കേന്ദ്ര ഭദ്രാസന സമിതി അംഗങ്ങള്‍ തുടങ്ങിയവര്‍ സന്നിഹിതരായി.
