ആറന്മുള : ആറൻമുള വിമാനത്താവള പദ്ധതിയിലെ ഡ്രോൺ സർവ്വേയിൽ ശക്തമായ പ്രതിഷേധവുമായി മുതിർന്ന ബിജെപി നേതാവ് കുമ്മനം രാജശേഖരൻ.പദ്ധതി പുനരാലോചിക്കുന്നതിന് പിന്നിൽ ഭൂമിക്കച്ചവട താൽപര്യങ്ങളാണുള്ളതെന്ന് അദ്ദേഹം ആരോപിച്ചു.
വിമാനത്താവള പദ്ധതിക്ക് ബിജെപി എതിരല്ല, എന്നാൽ അത് ആറന്മുളയിൽ തന്നെ നടപ്പാക്കണമെന്ന നിർബന്ധമാണ് ദുരൂഹമെന്ന് കുമ്മനം പറഞ്ഞു. പത്തനംതിട്ട ജില്ലയിൽ തന്നെ കൊടുമൺ ഉൾപ്പെടെയുള്ള അനുയോജ്യമായ പ്രദേശങ്ങൾ വിമാനത്താവളത്തിനായി പരിഗണിക്കാമെന്നും അദ്ദേഹം അഭിപ്രായപെട്ടു.
ആറന്മുളയുടെ ഭൂപ്രകൃതിയും പരിസ്ഥിതി സാഹചര്യവും വലിയ നിർമാണങ്ങൾക്ക് അനുയോജ്യമല്ലെന്നും, എല്ലാ വർഷവും വെള്ളപ്പൊക്ക ഭീഷണി നേരിടുന്ന പ്രദേശമാണ് ആറന്മുളയെന്നും കുമ്മനം ചൂണ്ടിക്കാട്ടി. വയനാട് ദുരന്തം കണ്ടിട്ടും സർക്കാർ പാഠം പഠിച്ചില്ലെന്നും അദ്ദേഹം വിമർശിച്ചു. പുതിയ സർക്കാർ വന്നെന്ന പേരിൽ ജനങ്ങളെ ഭയപ്പെടുത്താനാകില്ലെന്നും, പദ്ധതി ആറന്മുളയിൽ നടപ്പാക്കാൻ ശ്രമിച്ചാൽ ജനകീയ പ്രക്ഷോഭങ്ങൾക്ക് ബിജെപി നേതൃത്വം നൽകുമെന്നും കുമ്മനം വ്യക്തമാക്കി.
