പത്തനംതിട്ട: ശബരിമലയിൽ അയ്യപ്പഭക്തർ എത്തിക്കുന്ന നെയ്യ് മാത്രം ഉപയോഗിച്ച് അരവണയും അപ്പവും നിർമിക്കാൻ ആവശ്യമായ നെയ്യ് ലഭിക്കില്ലെന്ന വിലയിരുത്തലിനെത്തുടർന്ന് ടെൻഡർ വഴി നെയ്യ് വാങ്ങാൻ തിരുവിതാംകൂർ ദേവസ്വം ബോർഡ് തീരുമാനിച്ചു.
മണ്ഡല–മകരവിളക്ക് തീർഥാടനകാലം ആരംഭിക്കാനിരിക്കെ അരവണയുടെയും അപ്പത്തിന്റെയും നിർമാണത്തിന് ആവശ്യമായ നെയ്യ് ഉറപ്പാക്കുകയാണ് ദേവസ്വം ബോർഡിന്റെ ലക്ഷ്യം. ഭക്തർ സന്നിധാനത്ത് എത്തിക്കുന്ന നെയ്യ് മാത്രം ആശ്രയിച്ച് ഉൽപാദനം നടത്തുന്നത് പ്രായോഗികമല്ലെന്നാണ് വിലയിരുത്തൽ. ഇതോടെയാണ് ടെൻഡർ നടപടികളിലേക്ക് ബോർഡ് കടന്നത്.
ദേവസ്വം ബോർഡ് പ്രസിഡന്റ് കെ. ജയകുമാറിൻ്റെ നിർദേശ പ്രകാരം ഒരാഴ്ചയ്ക്കുള്ളിൽ ടെൻഡർ നടപടികൾ പൂർത്തിയാക്കും. നിശ്ചിത മാനദണ്ഡങ്ങൾ പാലിച്ച് മിൽമയ്ക്കും ടെൻഡറിൽ പങ്കെടുക്കാം. മുൻപ് സ്വീകരിച്ച നിലപാടിൽ മാറ്റം വരുത്തിയെങ്കിലും മിൽമയ്ക്ക് നേരിട്ട് വിതരണച്ചുമതല നൽകുന്നതിന് പകരം ടെൻഡർ നടപടികളിലൂടെയായിരിക്കും നെയ്യ് വാങ്ങുക. കഴിഞ്ഞ തീർഥാടനകാലത്ത് മിൽമയുടെ പേരിൽ വ്യാജ നെയ്യ് ശബരിമലയിലെത്തിയെന്ന ആരോപണം വലിയ വിവാദമായിരുന്നു.
അരവണ നിർമാണത്തിനായി വാങ്ങിയ നെയ്യുമായി ബന്ധപ്പെട്ട ഇടപാടുകളിൽ ക്രമക്കേട് നടന്നെന്ന പരാതിയിൽ അന്വേഷണം തുടരുകയാണ്. നെയ്യ് വിതരണവുമായി ബന്ധപ്പെട്ട ഇടപാടുകളിൽ രണ്ടര കോടിയിലധികം രൂപയുടെ ക്രമക്കേട് നടന്നെന്നായിരുന്നു പ്രാഥമിക വിജിലൻസ് കണ്ടെത്തൽ. കേസിൽ മുൻ ദേവസ്വം ബോർഡ് പ്രസിഡന്റ് പി.എസ്. പ്രശാന്ത് ഉൾപ്പെടെയുള്ളവരെ പ്രതിചേർത്ത് അന്വേഷണം നടക്കുകയാണ്
ഈ പശ്ചാത്തലത്തിലാണ് ഇത്തവണ മിൽമയിൽനിന്ന് നെയ്യ് വാങ്ങേണ്ടെന്ന തീരുമാനം ദേവസ്വം ബോർഡ് ആദ്യം സ്വീകരിച്ചത്. എന്നാൽ, ഭക്തർ കൊണ്ടുവരുന്ന നെയ്യുടെ അളവ് ആവശ്യത്തിന് തികയില്ലെന്ന് വ്യക്തമായതോടെ തീരുമാനം പുനഃപരിശോധിക്കേണ്ടിവന്നു. നെയ്യുടെ ലഭ്യതക്കുറവ് അരവണയുടെയും അപ്പത്തിന്റെയും ഉൽപാദനത്തെ ബാധിക്കാതിരിക്കുകയാണ് ഇപ്പോഴത്തെ നീക്കത്തിന്റെ പ്രധാന ലക്ഷ്യം.
നെയ്യ് സംഭരിക്കുന്നതിലും വിതരണം ചെയ്യുന്നതിലും ഗുണനിലവാരം ഉറപ്പാക്കുന്നതിനൊപ്പം ഭക്ഷ്യസുരക്ഷാ പരിശോധനകൾക്കും ദേവസ്വം ബോർഡ് പ്രാധാന്യം നൽകുന്നുണ്ട്. ശബരിമലയിലും പമ്പയിലും അടുത്ത മാസം പത്തിനുമുമ്പ് ഭക്ഷ്യസുരക്ഷാ ലാബുകളുടെ കൗണ്ടറുകൾ പ്രവർത്തിപ്പിക്കുന്നതിനുള്ള നടപടികളും ആരംഭിച്ചിട്ടുണ്ട്..
ടെൻഡർ നടപടികൾ സമയബന്ധിതമായി പൂർത്തിയാക്കി ആവശ്യമായ നെയ്യ് ലഭ്യമാക്കാനായാൽ തീർഥാടനകാലത്തെ പ്രസാദ നിർമാണം സുഗമമായി മുന്നോട്ടുകൊണ്ടുപോകാൻ സാധിക്കും. അതേസമയം, മുൻവർഷത്തെ ക്രമക്കേട് വിവാദത്തിന്റെ പശ്ചാത്തലത്തിൽ നെയ്യുടെ ഗുണനിലവാരം, വിതരണത്തിലെ സുതാര്യത, പരിശോധനാ സംവിധാനങ്ങൾ എന്നിവ ഉറപ്പാക്കേണ്ടത് നിർണായകമാണ്.
