പത്തനംതിട്ട: ജാതിഭേദവും മതദ്വേഷവുമില്ലാതെ സർവ്വചരാചരങ്ങളുടെയും നന്മയ്ക്കായി ശ്രീനാരായണഗുരു രചിച്ച അമരകൃതി ‘ദൈവദശക’ത്തിന്റെ ആഗോള പ്രാർത്ഥന ഇന്ന് വൈകിട്ട് 7:15-ന് നടക്കും. ലോകമെമ്പാടുമുള്ള ദശലക്ഷക്കണക്കിന് ഗുരുഭക്തരും പ്രവാസി മലയാളികളും തങ്ങളിരിക്കുന്ന ഇടങ്ങളിൽ ഏകമനസ്സോടെ ഈ സമയം പ്രാർത്ഥനയിൽ പങ്കാളികളാകും.
ജർമനി ആസ്ഥാനമായി പ്രവർത്തിക്കുന്ന ശ്രീനാരായണ ഫോറം ഫോർ യൂണിവേഴ്സൽ
ബ്രദർ ഹുഡിൻ്റെ നേതൃത്വത്തിൽ മാനവരാശിയുടെ ശാന്തിക്കും ഐക്യത്തിനും വേണ്ടിയാണ് ആഗോള ദൈവ ദശക ആലാപനം നടത്തുന്നത്. വീടുകളിലും ഗുരുമന്ദിരങ്ങളിലും ആശ്രമങ്ങളിലും ഇതര സാംസ്കാരിക കേന്ദ്രങ്ങളിലും ഇന്ന് വൈകിട്ട് കൃത്യം 7:15-ന് പ്രാർത്ഥന ഉയരും.
ലോകത്ത് വർദ്ധിച്ചു വരുന്ന സംഘർഷങ്ങൾക്കും ദുരിതങ്ങൾക്കും ആശ്വാസമായി ഗുരുദർശനങ്ങളുടെ പ്രസക്തി ജനങ്ങളിലേക്ക് എത്തിക്കുക എന്ന ലക്ഷ്യവും ഈ കൂട്ടപ്രാർത്ഥനയ്ക്ക് പിന്നിലുണ്ട്. ജാതി-മത-ദേശ ഭാഷാതിർത്തികൾക്കതീതമായി പ്രാർത്ഥനയിൽ പങ്കാളികളാകാൻ സംഘാടകർ അഭ്യർത്ഥിച്ചു.
