പത്തനംതിട്ട: പശ്ചിമഘട്ടത്തിലെ പരിസ്ഥിതി ലോല പ്രദേശവും വിനോദസഞ്ചാരികളുടെ പ്രധാന ആകർഷണ കേന്ദ്രവുമായ ഗവിയിൽ ഡീസൽ, പെട്രോൾ വാഹനങ്ങൾക്ക് നിരോധനം ഏർപ്പെടുത്താൻ സർക്കാർ നീക്കം. പ്രകൃതിയുടെ സന്തുലിതാവസ്ഥ സംരക്ഷിക്കുന്നതിനും വനമേഖലയിലെ മലിനീകരണം കുറയ്ക്കുന്നതിനുമുള്ള നടപടികളുടെ ഭാഗമായാണ് ഇത്തരമൊരു നിയന്ത്രണം സർക്കാർ ആലോചിക്കുന്നത്.
പകരം വനം വകുപ്പിൻ്റെ ചെക് പോസ്റ്റുകളിൽ നിന്ന് ഇലക്ട്രിക് വാഹനങ്ങളിൽ സഞ്ചാരികളെ യഥാ സ്ഥാനങ്ങളിൽ എത്തിക്കാനാണ് സർക്കാർ ആലോചിക്കുന്നതെന്ന് മന്ത്രി ഷിബു ബേബിജോൺ ദേശം ന്യൂസിനോട് പറഞ്ഞു
ഗവിയിൽ പ്രതിദിനം നിരവധി വിനോദസഞ്ചാരികളാണ് എത്തുന്നത്. വനത്തിലൂടെയുള്ള യാത്രയും തടാകങ്ങളും അണക്കെട്ടുകളും മലനിരകളും വന്യജീവികളുടെ സാന്നിധ്യവുമാണ് ഗവിയെ സഞ്ചാരികളുടെ പ്രിയപ്പെട്ട ഇടമാക്കി മാറ്റുന്നത്. എന്നാൽ വാഹനങ്ങളുടെ വർധനയും അവയിൽനിന്നുള്ള പുകയും ശബ്ദമലിനീകരണവും വനാന്തരീക്ഷത്തിന് ഭീഷണിയാകുന്ന സാഹചര്യത്തിലാണ് നിയന്ത്രണ നീക്കം.
നിലവിൽ ഡീസൽ, പെട്രോൾ വാഹനങ്ങൾക്ക് പകരം മലിനീകരണം കുറഞ്ഞതും പരിസ്ഥിതിക്ക് അനുയോജ്യവുമായ ഗതാഗത സംവിധാനങ്ങൾ , ഇലക്ട്രിക് വാഹനങ്ങൾ ഉൾപ്പെടെയുള്ളവ ഇതിനായി ഉപയോഗപ്പെടുത്താനാകുമോയെന്നതും പ്രസക്തമാണ്.
