പത്തനംതിട്ട: കിടപ്പുരോഗികൾക്കും ഗുരുതര ശ്വാസകോശ-ശാരീരിക അസുഖങ്ങൾ ബാധിച്ച് വീടുകളിൽ കഴിയുന്നവർക്കും വലിയ ആശ്വാസവുമായി സംസ്ഥാന വൈദ്യുതി ബോർഡ്. വീടുകളിൽ ജീവൻ രക്ഷാ ഉപകരണങ്ങൾ പ്രവർത്തിപ്പിക്കുന്ന രോഗികൾക്ക് സൗജന്യ വൈദ്യുതി ആനുകൂല്യം നൽകുന്ന പദ്ധതി കൂടുതൽ ലളിതവും വേഗത്തിലുമാക്കി.
പദ്ധതിക്കായി മുമ്പ് ആവശ്യപ്പെട്ടിരുന്ന 200 രൂപയുടെ മുദ്രപ്പത്രത്തിലെ സത്യവാങ്മൂലം ഒഴിവാക്കിയതാണ് പ്രധാന മാറ്റം. ഇനിമുതൽ വെറുമൊരു വെള്ളക്കടലാസിൽ എഴുതിയ സത്യവാങ്മൂലം മാത്രം നൽകിയാൽ മതിയാകും. സാമ്പത്തിക പ്രയാസം അനുഭവിക്കുന്ന ആയിരക്കണക്കിന് കിടപ്പുരോഗികളുടെ കുടുംബങ്ങൾക്ക് ഈ തീരുമാനം വലിയ തണലാകും.
ജീവൻ രക്ഷാ ഉപകരണങ്ങൾ പ്രവർത്തിപ്പിക്കാൻ ആവശ്യമുള്ള വൈദ്യുതിക്ക് തത്തുല്യമായ നിരക്കിലാണ് ഇളവ് അനുവദിക്കുന്നത്. ഓക്സിജൻ കോൺസെൻട്രേറ്റർ, വെന്റിലേറ്റർ, എയർ ബെഡ്, സക്ഷൻ മെഷീൻ തുടങ്ങിയ ജീവൻ രക്ഷാ ഉപകരണങ്ങൾ 24 മണിക്കൂറോ നിശ്ചിത സമയമോ വീടുകളിൽ ഉപയോഗിക്കേണ്ടി വരുന്ന ഗുരുതര രോഗികൾക്കാണ് ഈ ആനുകൂല്യത്തിന് യോഗ്യത.
പദ്ധതിയിലേക്ക് അപേക്ഷിക്കുന്നതിനായി കെഎസ്ഇബി പ്രത്യേകം ഫീസുകളൊന്നും ഈടാക്കുന്നില്ല.രോഗി ഉപയോഗിക്കുന്ന ഉപകരണത്തിന്റെ വാട്ടേജ് അത് ദിവസവും പ്രവർത്തിപ്പിക്കുന്ന സമയം എന്നിവ കൃത്യമായി കണക്കാക്കിയാണ് ഇളവ് തുക നിർണ്ണയിക്കുന്നത്. ഇത് സംബന്ധിച്ച് അതത് കെഎസ്ഇബി സെക്ഷനിലെ അസിസ്റ്റന്റ് എൻജിനീയറാണ് പരിശോധിച്ച് അന്തിമ തീരുമാനമെടുക്കുന്നത്.
