കോഴഞ്ചേരി: കാർഷിക മേഖലയിൽ സ്ത്രീകളുടെ പങ്കാളിത്തം ഉറപ്പാക്കാനും വനിതകളുടെ വരുമാനം വർദ്ധിപ്പിക്കാനുമായി കൃഷി വകുപ്പ് ‘കൃഷി സഖി’ പദ്ധതിക്ക് തുടക്കമിടുന്നു. വനിതാ കർഷകരുടെയും സംരംഭകരുടെയും ഉൽപ്പാദനശേഷി കൂട്ടാനും മൂല്യവർദ്ധിത ഉൽപ്പന്ന നിർമ്മാണത്തിലൂടെ മെച്ചപ്പെട്ട ഉപജീവനമാർഗ്ഗം ഉറപ്പാക്കാനുമാണ് പദ്ധതി ലക്ഷ്യമിടുന്നത്.
ഗ്രാമപ്രദേശങ്ങളിലെ വനിതാ കർഷകക്കൂട്ടായ്മകൾ രൂപീകരിച്ചും, 5 മുതൽ 20 വരെ അംഗങ്ങളുള്ള സ്വയംസഹായ ഗ്രൂപ്പുകൾക്ക് പ്രത്യേക കാർഷിക പരിശീലനങ്ങളും ധനസഹായങ്ങളും നൽകിയുമാണ് പദ്ധതി നടപ്പിലാക്കുന്നത്. കാർഷികവിളകളുടെ മൂല്യവർദ്ധനവ്, കാലാവസ്ഥാ അനുയോജ്യമായ കൃഷിരീതികൾ, വിപണന സാധ്യതകൾ എന്നിവയിൽ കർഷകർക്ക് വിദഗ്ദ്ധ പരിശീലനം ലഭ്യമാക്കും.
ഗ്രാമീണ മേഖലയിലെ തരിശുഭൂമികൾ കണ്ടെത്തി കൃഷിയോഗ്യമാക്കുന്നതിനും പച്ചക്കറി, നാളികേര കൃഷികൾ പ്രോത്സാഹിപ്പിക്കുന്നതിനും കൃഷി സഖി ഗ്രൂപ്പുകളുടെ സേവനം പ്രയോജനപ്പെടുത്തും. കാർഷിക മേഖലയിലെ വനിതാ കൂട്ടായ്മകളെ ശക്തിപ്പെടുത്തുന്നതിലൂടെ കുടുംബങ്ങളുടെ സാമ്പത്തിക ഭദ്രത ഉറപ്പാക്കാൻ പദ്ധതിക്കാവുമെന്നാണ് കൃഷി വകുപ്പിന്റെ പ്രതീക്ഷ.
