റാന്നി: ശബരിമലയിലേക്കുള്ള ചരിത്രപ്രസിദ്ധമായ തിരുവാഭരണ പാതയിലെ കൈയേറ്റങ്ങൾ ഒഴിപ്പിക്കുന്നതിൽ ജില്ലാ ഭരണകൂടം തുടരുന്ന അനാസ്ഥയിൽ പ്രതിഷേധവുമായി തിരുവാഭരണ പാത സംരക്ഷണ സമിതി. ഒഴിപ്പിക്കൽ നടപടികൾ ആരംഭിച്ചതായി അധികൃതർ അറിയിച്ചിട്ടുണ്ടെങ്കിലും മുൻകാല അനുഭവങ്ങൾ വെച്ച് ഇത് വിശ്വാസത്തിലെടുക്കാനാവില്ലെന്ന്
കൈയേറ്റങ്ങൾ സംബന്ധിച്ച് കോഴഞ്ചേരി താലൂക്കിന്റെ തൽസ്ഥിതി റിപ്പോർട്ട് മാത്രമാണ് നവംബർ 15-ന് ഡെപ്യൂട്ടി കലക്ടർ കൈമാറിയത്. റാന്നി താലൂക്കിലെ വിവരങ്ങൾ ഇതുവരെ ലഭ്യമാക്കിയിട്ടില്ല. പാതയിൽ ആകെ കണ്ടെത്തിയ 485 കൈയേറ്റങ്ങളിൽ 57 എണ്ണം പുതിയ പട്ടികയിൽ നിന്ന് ഒഴിവാക്കപ്പെട്ടിട്ടുണ്ട്.
2022 ഒക്ടോബർ 19-ന് ഹൈക്കോടതി പുറപ്പെടുവിച്ച ഉത്തരവ് പ്രകാരം മൂന്ന് മാസത്തിനകം നോട്ടീസ് നൽകി ഒഴിപ്പിക്കൽ പൂർത്തിയാക്കേണ്ടതായിരുന്നു. നാലു വർഷം പിന്നിട്ടിട്ടും നടപടികൾ ഇഴഞ്ഞുനീങ്ങുകയാണ്. 2009-ൽ തന്നെ കണ്ടെത്തിയ കൈയേറ്റങ്ങളുടെ കാര്യത്തിലാണ് ഈ മെല്ലെപ്പോക്ക്.
നടപടികൾ വൈകുന്നതിനെതിരെ സമിതി നൽകിയ കോടതിയലക്ഷ്യ ഹർജി നവംബർ 18-ന് ഹൈക്കോടതി പരിഗണിച്ചിട്ടുണ്ട്. വെറും പ്രഖ്യാപനങ്ങൾക്കും റിപ്പോർട്ടുകൾക്കും അപ്പുറം, റാന്നി താലൂക്കിലെ കണക്കുകൾ കൂടി പുറത്തുവിട്ട് ഒഴിവാക്കപ്പെട്ട 57 എണ്ണം ഉൾപ്പെടെയുള്ള മുഴുവൻ കൈയേറ്റങ്ങളും ഉടൻ ഒഴിപ്പിച്ച് പാത വീണ്ടെടുക്കണമെന്ന് സമിതി ആവശ്യപ്പെട്ടു.





