പാലക്കാട് : സർക്കാർ ആശുപത്രിയിൽ മകളുമായെത്തിയ യുവതിയെ പാമ്പു കടിച്ചു. ഇന്ന് രാവിലെ ചിറ്റൂർ താലൂക്ക് ആശുപത്രിയിൽ വച്ചാണ് പാലക്കാട് പുതുനഗരം കരിപ്പോട് സ്വദേശിനി ഗായത്രിക്ക് പാമ്പ് കടിയേറ്റത്. ആശുപത്രിയിലെ സ്ത്രീകളുടെ വാർഡിൽ നിന്നാണ് പാമ്പുകടിയേറ്റത്.
ചെറിയ വിഷപ്പാമ്പാണ് യുവതിയെ കടിച്ചത്. യുവതിയുടെ ആരോഗ്യ നില തൃപ്തികരമാണെന്ന് പാലക്കാട് ജില്ലാ ആശുപത്രി അധികൃതർ അറിയിച്ചു. പെരുച്ചാഴിയും മറ്റ് ജീവികളുമായി വൃത്തിഹീനമായ ചുറ്റുപാടാണ് ആശുപത്രിയിലേതെന്ന് നാട്ടുകാർ ആരോപിക്കുന്നു. സംഭവത്തിൽ ചിറ്റൂർ താലൂക്ക് ആശുപത്രി അധികൃതരോട് ഡിഎംഒ റിപ്പോർട്ട് തേടി.
