ന്യൂഡൽഹി: പശ്ചിമേഷ്യയില്‍ സംഘര്‍ഷം തുടരുന്നതിനിടെ ഏഴ് ദിവസത്തിനുള്ളില്‍ ഹോര്‍മൂസ് തുറക്കാന്‍ തയാറെന്ന് നിബന്ധനകള്‍ വെച്ച് ഇറാന്‍. അമേരിക്ക സൈനിക സമ്മര്‍ദ്ദം കുറയ്ക്കുകയും തുറമുഖങ്ങള്‍ക്ക് മേലുള്ള ഉപരോധം പിന്‍വലിക്കണമെന്നും ഇറാന്‍ നിബന്ധനവെച്ചിട്ടുണ്ട്.
അമേരിക്കയുമായുള്ള ചര്‍ച്ചകള്‍ പുനരാരംഭിക്കാനുള്ള സന്നദ്ധത അറിയിച്ചാണ് ഇറാന്റെ നീക്കം. മധ്യസ്ഥര്‍ മുഖേന ഈ നിര്‍ദ്ദേശം സെപ്റ്റംബര്‍ 16-നാണ് ഇറാന്‍ അമേരിക്കയെ അറിയിച്ചത്. ന്യൂയോര്‍ക്കില്‍ നടക്കുന്ന ഐക്യരാഷ്ട്രസഭയുടെ പൊതുസമ്മേളനത്തിനിടെ മധ്യസ്ഥ രാജ്യങ്ങളുമായി ഈ വിഷയം ചര്‍ച്ച ചെയ്യാനും ഇറാന്‍ പദ്ധതിയിടുന്നുണ്ട്.
യുഎസ്-ഇറാന്‍ സംഘര്‍ഷം ഊര്‍ജ്ജ വിപണികളെയും ആഗോള കപ്പല്‍ ഗതാഗതത്തെയും, പ്രത്യേകിച്ച് തന്ത്രപ്രധാനമായ ഈ സമുദ്രപാതയെയും ബാധിച്ചിട്ടുണ്ട്. ഹോര്‍മൂസുമായി ബന്ധപ്പെട്ട സൈനിക നടപടികള്‍ അമേരിക്ക അവസാനിപ്പിക്കണമെന്നാണ് ഇറാന്റെ ആവശ്യം. ഈ ആവശ്യം അംഗീകരിച്ചാല്‍ കടലിടുക്ക് വീണ്ടും തുറക്കാനും ചര്‍ച്ചകള്‍ പുനരാരംഭിക്കാനും തയ്യാറാണെന്നാണ് ഇറാന്‍ വ്യക്തമാക്കുന്നത്.
