കോഴഞ്ചേരി : പത്തനംതിട്ട ജില്ലയിലെ നാരങ്ങാനം നെല്ലിക്കാല റോഡിൽ കാട്ടു പന്നികളുടെ ശല്യം വൻതോതിൽ വർധിക്കുന്നതായി പരാതി. രാത്രികാലങ്ങളിലാണ് പ്രദേശത്ത് പന്നികളുടെ ശല്യം സഹിക്കാനാവാത്ത വിധം ഉയരുന്നത്. ഇതോടെ ഇതുവഴിയുള്ള ഇരുചക്രവാഹന യാത്രക്കാരും കാൽനടയാത്രക്കാരും ഭീതിയിലാണ്.
മാലിന്യം തള്ളൽ പ്രധാന കാരണം റോഡരികുകളിൽ അലക്ഷ്യമായി തള്ളുന്ന അവശിഷ്ടങ്ങളും ജൈവമാലിന്യങ്ങളുമാണ് പന്നികളെ വൻതോതിൽ ആകർഷിക്കുന്നത്. രാത്രിയുടെ മറവിൽ വഴിയോരങ്ങളിൽ മാലിന്യം വലിച്ചെറിയുന്ന പ്രവണത വർധിച്ചതോടെയാണ് പന്നികൾ കൂട്ടത്തോടെ റോഡിലേക്ക് ഇറങ്ങാൻ തുടങ്ങിയത്. മാലിന്യം തിന്നാനായി എത്തുന്ന കാട്ടു പന്നികൾ റോഡിനു കുറുകെ ചാടുന്നത് പലപ്പോഴും ഗുരുതരമായ വാഹന അപകടങ്ങൾക്കും കാരണമാകുന്നുണ്ട്.
നാട്ടുകാരുടെ ഭീതിയും ആവശ്യങ്ങളും വൈകുന്നേരങ്ങൾക്ക് ശേഷം ഈ റോഡിലൂടെ ഭയത്തോടെ മാത്രമേ സഞ്ചരിക്കാൻ കഴിയൂ എന്ന് പ്രദേശവാസികൾ പറഞ്ഞു. കൃഷിയിടങ്ങളിലേക്ക് പന്നികൾ ഇറങ്ങുന്നത് കർഷകർക്ക് വൻ സാമ്പത്തിക നഷ്ടവും വരുത്തിവെക്കുന്നുണ്ട്. റോഡരികുകളിൽ മാലിന്യം തള്ളുന്നവർക്കെതിരെ ശക്തമായ നിയമനടപടികൾ സ്വീകരിക്കണം.
മാലിന്യം തള്ളുന്നവരെ കണ്ടെത്താൻ പ്രധാന കേന്ദ്രങ്ങളിൽ ക്യാമറകൾ സ്ഥാപിക്കണമെന്ന് നാട്ടുകാർ ആവശ്യപ്പെട്ടു . ജനവാസ മേഖലയിലിറങ്ങി ഭീതി വിതയ്ക്കുന്ന കാട്ടു പന്നികളെ തുരത്താൻ വനംവകുപ്പും തദ്ദേശ സ്വയംഭരണ സ്ഥാപനങ്ങളും അടിയന്തര നടപടി സ്വീകരിക്കണമെന്നതും പ്രദേശവാസികളുടെ ദീർഘനാളായുള്ള ആവശ്യമാണ്.
