മലപ്പുറം : കാണാതായ തിരൂര്‍ ഡപ്യൂട്ടി തഹസില്‍ദാര്‍ പി.ബി.ചാലിബ് കർണാടകയിൽ. രാവിലെ ഭാര്യയെ ഫോണില്‍ വിളിച്ച അദ്ദേഹം താൻ കർണ്ണാടകയിലുണ്ടെന്നും മാനസിക പ്രയാസത്തിൽ പോയതെന്നുമാണ് അറിയിച്ചത്. ഒറ്റയ്ക്കാണ് ഉള്ളതെന്നും വീട്ടിലേക്ക് തിരിച്ചു വരുമെന്നും ചാലിബ് ഭാര്യയെ അറിയിച്ചു.
ബുധനാഴ്ച വൈകിട്ട് ഓഫിസിൽ നിന്ന് ഇറങ്ങിയ ചാലിബ് വൈകുമെന്നു വീട്ടിലേക്കു വിളിച്ചുപറഞ്ഞശേഷം തിരികെ എത്തിയില്ല. ഇതോടെ ഇദ്ദേഹത്തെ കാണാനില്ലെന്ന് കാണിച്ച് ബന്ധുക്കള്‍ കഴിഞ്ഞ ദിവസം തിരൂര്‍ പൊലീസില്‍ പരാതി നല്‍കിയിരുന്നു. മൊബൈല്‍ ടവര്‍ ലൊക്കേഷന്‍ ആദ്യം കോഴിക്കോട്ടും പിന്നീട് ഉഡുപ്പിയിലുമാണ് കാണിച്ചത്. പിന്നീട് ഫോൺ സ്വിച്ച് ഓഫായി .എടിഎമ്മിൽ നിന്ന് പതിനായിരം രൂപ പിൻവലിച്ചതായും പൊലീസ് കണ്ടെത്തിയിരുന്നു .
